平台期……

經常聽見人話減肥去到咁上下會出現平台期，自己近日就跌入呢個樽頸位，體重減磅因為唔單止冇進展，仲有少少反彈，比起早陣子最好成績時回彈了兩三磅。

不過，我又覺得所謂平台期，多少係因為自己意志力不足，因為飲食上比前放鬆了，早前一日食一兩餐燕麥片的毅力沒有了，又再變得多以零食充飢，有乜辦法唔死？

另一個令減磅大計受阻的是自上個月中開始，家居旁的運動場因為東亞運動會而暫停開放跑步徑，令我失去一個晚上可以舒適練跑的空間，要改為早上落屋苑樓下跑，但我有一個堅持，遲過早上五點就唔會落街跑了，因為覺得樓下會開始多人，亦即是無法在早上四點左右起身，該日就會放棄唔跑(今早就因為五點半先起身而又放棄了……)。但要四點起到身，最遲即係要晚上十點左右就要瞓，呢一個先係最大問題，只要晚上稍有節目，一定唔駛旨意咁早瞓，即係又起唔到身，又唔駛跑！

所以對我來講，東亞運動會並冇任何提倡運動的氣氛，反而成為我少了運動的原因，今日呢個只有政府自high的活動終於開幕了，唔該快快搞完，唔好阻住我的正常練跑大計！

☆   ☆   ☆   ☆   ☆   ☆   ☆   ☆   ☆