網誌分類：好戲隆重上映 |
圖片
網誌日期：2010-02-08 12:30
「邵氏出品 必屬佳片」，呢句深入民心0既金句，至今一直念念不忘。由邵氏兄弟（香港）有限公司、 TVB 0係 2009 年首部出品電影《 Laughing Gor 之变節》大收旺場後，兩大勢力今年會開拍多部電影，融合全球觀眾品味。其中一部更係今年邵氏重新投資電影0既大製作《 72 家租客》，由邵氏、 TVB 、 UFO 、銀都以及新華展望傳媒聯合出品0既電影《 72 家租客》，以 1973 年邵氏經典電影《七十二家房客》為藍本，故事以全新創作，當中只有某部份角色雷同。由超過共有 180 位多位兩岸三地歌影視紅星（其中有 90% 來自 TVB 全台藝員）參演0既喜劇，參演人數之多創下港產片近十年之最，因此被冠以港版《建國大業》0既稱號，唯一唔同0既係呢部戲係一部完全商業大片。
《 72 家租客》以兩大影帝“天王歌神”張學友、“獎門人”曾志偉、影后袁詠儀（靚靚）、三位 TVB 0既人氣小生花旦：黃宗澤（ Bosco ）、王祖藍、鍾嘉欣（ Linda ）以及歌星鄧麗欣（ Stephy ），由頭到尾擔綱演出。“獎門人”志偉為0左省邵氏呢個金漆招牌，更身兼監製、編劇、導演等崗位，係廿年來最勤力0既一次，聯同志偉一齊執導0既有曾經拍過唔少愛情電影系列0既導演葉念琛以及《電影鴨》0既鍾澍佳。而“歌神”學友自爆收舊價演出；邵氏當年拍攝0既《七十二家房客》，由岳華、井莉、胡錦、何守信（何 Bee ）、沈殿霞、李修賢（修哥）、鄭少秋（秋官）、許冠英等主演，以嬉笑怒罵手法道出社會不公平現象，挖苦當時貪污成風0既港府，令觀眾有所共鳴兼捧腹大笑。戲中有唔少經典對白，例如「有水有水，無水無水，有水過水，無水散水」，以及「樓下閂水喉」等。所以電影開首部份，特別由天映娛樂有限公司，借出電影《七十二家房客》尾段結局作開場， TVB 電視廣播業務總經理陳志雲（ Stephen ）擔任開場旁白。
故事穿梭七十年代至今，由懷舊演到千禧年代，以志偉、學友爭奪袁靚靚作為骨幹。講述香港人0既精神、情懷，並加入一0的耳熟能詳0既情節，噱頭十足。故事發生0係《七十二家房客》0既尾段，年輕哈公（側田 Justin ）、年輕石堅（林峰）兩個結拜兄弟為幫助七十二家房客免遭逼遷，以及營救慘被逼婚0既小桃紅（陳法拉 Fala ），同心合力協助所有房客智退太子炳（林家棟）、包租婆（佘詩曼）。雨過天晴，兩兄弟同時向深愛0既小桃紅求婚，小桃紅難以抉擇，只好以「擲銀仔」決定終身幸福。最後，小桃紅下嫁於哈公。石堅一直難以接受被哈公橫刀奪愛0既仇恨。結果兩兄弟0係生意上鬥過你死我活，由鬥穿膠花、鬥賣臭豆腐、鬥賣明星閃卡、直至今日鬥賣電器，由 1973 年鬥至 2010 年。
今天，0係全城最熱鬧的焦點所在0既旺角西洋菜街，除0左二人大鬥法之餘，同時上演0左一段 72 家租客有笑有淚0既故事。旺角西洋菜街係香港商家0既必爭之地，商戶各出其謀鬥過你死我活，然而往往鷸蚌相爭，漁人得利，最大得益者竟然係背後0既國內大業主（梁天）。電器店出動“0靚模”促銷、漫畫店增設 Lolita 腳底按摩等，一切商戶明爭暗鬥，都不及大業主一聲令下，要貢獻三倍租金，甚至關門大吉。正值呢個非常時期，西洋菜街更出現鏹水狂徒， 72 家租客捍衛家園0既熱血一時澎湃。0係呢個風聲鶴唳之下，哈公（志偉）、石堅（學友）、小桃紅（袁靚靚）0既三角關係、甚至兩家0既下一代：愛跳 MJ 舞0既哈仔太郎（ Bosco ）以及迷上日本 AV 0既堅女胡里玉（ Stephy ）0既轟烈愛情、仲有矮仔多計0既石小堅（祖藍）以及功夫女郎哈女（ Linda ）0既冤家愛情，都同時要來一個了斷！
早前0係本片完成後0既慶功宴上，志偉表示可以希望投資邵氏關注藝人片酬問題。更大爆所有藝員獲得酬勞只有四位數字港幣以及一封利是內附「無言感激」四個字，志偉表示演員須要貼近市價，「拍膊頭」0既文化係可一不可再！邵氏高層黃家禧強調老闆一直以來都叫佢0地唔好難為一班 TVB 藝人，並已經聯同樂易玲小姐講求要畀合理價錢，相信樂小姐亦會咁樣做。黃先生更多謝張學友減價接拍，邵氏亦已準備開拍第三部戲。然而樂小姐指出， TVB 藝人齊心志在參與：「佢0地唔係拍來玩係想一齊共事，就係大家0既光榮」學友：「一封利是無言感激無我份，不過我都有歉意唔知有咁0既情況！」事後志偉直言身為演藝人協會會長只希望幫會員謀福利，其實個個都有錢收，不過好多都係低於市價。志偉又指出成部戲總投資三千萬，坦言以五千萬先至完成。問及所有藝員不滿令佢開腔爭取權益，志偉強調大家都明白事理，但最主要係唔想有壞風氣。
齊集全港歌、影、視紅星傾力演出0既賀歲電影《 72 家租客》，借一對結拜兄弟帶領街坊鄰里同心合力捍衛家園。片中帶出0既主題：無論任何年代，各行各業各自爭取發展空間之餘，仍舊充滿濃濃0既人情味！就如中國人過農曆新年所重視0既「情如一家」、「貴在人心」、「樂觀積極」、「聚首一堂」！為配合電影宣傳攻勢， TVB 翡翠台（ 81 台）以及高清翡翠台（ 85 台）今晚十點半起，一連四集0既賀年特備節目《 72 家過新年》，會分別以「情」、「貴」、「樂」、「聚」為主題，由片中演員走遍全港唔同角落，走訪本港各行各業市民準備過年0既情況、新年願望，更會同一班弱勢社群，例如綜援戶兒童等，一同分享電影首映，共迎「最有情味0既新年」！
號稱為港版《建國大業》，連路人甲乙丙都可以叫得出個名，所以好戲梗係一睇再睇，齊齊開心。上星期三晚0係圓方舉行首映，吸引逾百藝人撐場，現場更進行撈魚生儀式，寓意「撈起」。想今個虎年0係戲院笑餐飽，全角度虎虎生威0既話，《 72 家租客》係其中一部賀歲必睇之選！請即登入官方網頁： http://72.tvb.com/ ！
