AC 登基威震歐聯

加度素講過，0係一年之內，意大利贏0左世界盃，今年再贏歐聯，邊個會話意大利足球存在危機？ AC 米蘭由險被罰降班到上周三凌晨，大勝英超勁旅利物浦 2 : 1 高舉歐聯獎盃，為意大利爭光，只係十一個月0既事。 AC 0既球迷唔會諗到加度素0既民族大義，只覺盡解兩年前0既決賽被紅軍經典反勝0既鬱結，如今惡夢成過去，終可以放下心頭大石！

AC 米蘭同意大利球壇唇齒相依， 呢場決賽有七個正選都係意大利人。意大利舊年0係假波案0既陰霾下贏0左世界盃後，假波案審結致多支強隊受罰、西西里打0比亂局，以及羅馬上個月作客負曼聯 1 : 7 ，以上種種都為意大利球壇帶0黎不快0既名譽； AC 亦險被罰降班、上半季失利狀況之下終於走上歐洲之巔，難怪 AC 班主貝盧斯科尼承認呢0既勝利係為0左意大利。AC 今仗由恩沙基梅開二度後，直到完場前兩分鐘被古積特近門頂成 1 : 2 ，對於被追近，見證過兩年前球隊領先三球被扳平， AC 躉自當膽戰心驚。卡卡賽後卻坦言未驚過。

呢次係卡卡首次贏得歐聯錦標，佢0係賽事總共射入十球，不但榮膺賽事神射手，而深層意義係染指今年歐洲足球先生0既呼聲高唱入雲。佢認為 2005 年0既決賽係特別個案，即使重賽 1000 次，都唔會再出現同樣0既結果。有別於卡卡，今次已經係 AC 隊長馬甸尼第五次嚐得歐聯冠軍滋味，並平0左皇家馬德里0既名宿真度八次參與決賽0既紀錄。馬甸尼並未言退，佢認為呢個係一個好完美0既句號，好希望參加年底舉行0既世冠盃，然後再一次捧走歐聯。

同樣係隊長，利物浦0既謝拉特0係下半場半單刀射門被迪達擋出，未能扳平成球賽轉捩點。對於失落錦標，佢直認心如刀割，謝拉特話呢次係心恍如碎開兩邊，傷痛將會延續一段好長0既時間。至於利物浦0既領隊賓尼迪斯，0係賽後頻頻指住自己手錶，埋怨球證並無補足時間：佢話唔係搵輸波做藉口，補時應該係三分鐘，但結果僅得 2 分 45 秒。不過佢坦言輸波係咎由自取，利物浦已經失機頻頻，結果輸0左獎盃。 AC 米蘭係好值得獲勝。可以話，賓帥輸0左個球賽，但係贏0左風度。

AC 米蘭贏得球會第七個歐聯（前身為歐冠盃）錦標，名利雙收，據報收益接近 9000 萬歐元（約 9.4 億港元），貝盧斯科尼揚言會利用獎金大事擴軍。決賽獲勝後，大批 AC 0既球迷賽後0係米蘭大教堂外慶祝，旗海飄揚。盛傳 AC 擬向巴塞隆拿後衛森保達以及里昂後衛艾比度招手，而舒夫真高妻子日前公開表態支持丈夫回巢，的確加強「核彈頭」重作馮婦0既大好機會。今屆 AC 米蘭雖然0係四強被三支英超勁旅圍攻，仍能成功突圍捧盃，加上佢0地0係今 屆意甲得季軍，來屆可以聯同同市宿敵，即係今屆意甲冠軍國際米蘭，以及羅馬市雙雄羅馬、拉素，再戰歐聯。

今屆歐聯終告落幕，海外大莊家即為 2007 / 2008 球季歐聯開出奪標賠率，頂頭大熱係西甲0既巴塞隆拿以及英超0既車路士，賠率各為 7.5 倍；至於同樣來自英超0既曼聯，則以 8 倍緊隨其後。單係從莊家開出賠率分析，印證0左英超聯仍然盛世。難怪近三屆歐聯決賽，總會有英超球隊出席（利物浦 2004 / 2005 、 2006 / 2007 及阿仙奴 2005 / 2006 ）。德甲方面，歐聯常客拜仁慕尼黑今季成績差強人意，只能取得歐洲足協盃0既資格；取而代之參與下屆歐聯0既就有史特加、史浩克 04 以及雲達不來梅。但睇賠率，雲達不來梅只有 21 倍，已經係最熱0既一隊，再睇史浩克 04 0既 34 倍以及史特加0既 41 倍，反映莊家睇淡德甲隊下屆奪歐聯機會。

國際足協會長白禮達舊年拒為意大利頒發世界盃獎盃，以及批評意大利球隊並非實至名歸後，備受意大利人0既咒罵；白禮達於歐聯決賽後，表揚 AC 米蘭的確實力比較高，至於有「烏鴉口」之稱0既巴西球王比利終於遇上前錫菲聯領隊禾諾克0既詛咒。賽前比利預測 AC 米蘭將奪冠，按理 AC 米蘭應落敗；然而，禾諾克之前不滿紅軍以及曼聯害錫菲聯降班，詛咒呢兩支英超班霸分別痛失歐聯以及英格蘭足總盃，結果果然應驗。

今個禮拜輪到意甲終於煞科，國米提早封王。所有盟主已經名花有主。由於有線 62 體育台，將會直播法國網球公開賽。今個星期日晚九點，有線體育平台將會分途出擊！ AC 米蘭將會作客對主場0既里賈納，0係有線 61 足球台直播。另一場就係護級球隊生死戰：卡坦尼亞 VS 基爾禾，0係有線 63 台直播。最後一場護級戰就係錫耶納 VS 拉素，0係有線 64 球彩台直播。三場戲碼，場場精彩。新一季意大利甲組足球聯賽，還看有線！