三場夢幻比賽

由 Now 寬頻電視獨家直播0既 U21 歐洲國家盃，周六深夜將會上演一場夢幻決賽，由兩支小組冠軍荷蘭 U21 以及塞爾維亞 U21 角逐今屆錦標。預料雙方將會上演一場攻防生死戰，激鬥在所難免。星期六晚凌晨兩點半，荷蘭 U21 VS 塞爾維亞 U21 ， Now 687 台 Now Sports 2 直播。以下係兩支球隊0既賽前分析。

荷蘭 U21 0係決賽周四仗兩勝兩和，保持不敗紀錄，0係周三深夜0既準決賽同英格蘭 U21 激戰 120 分鐘，再經十六輪互射十二碼始能晉級，體力消耗不少。論攻力，荷蘭 U21 四仗攻入六球，前鋒歷達斯包辦當中三球，加上大國腳賴恩巴布，荷蘭 U21 前線攻力十足。不過四仗已經失0左四球，後防未算穩固。荷蘭 U21 雖有主場之利，狀態兵疲，未必能攻破銅牆鐵壁0既塞爾維亞 U21 ，就算想衛冕都有一定0既難度。

塞爾維亞 U21 今屆表現突出，0係決賽周四仗三勝一負，所敗一仗只係於肯定出線後敗於英格蘭 U21 ，球隊整體實力不俗。塞爾維亞 U21 四仗攻入四球，數字比較少，但入球0既球員較為分散，令對手較難防範，當中以馬略卡 U21 0既攻擊中場保斯高贊高域最具威脅。防守就係塞爾維亞 U21 0既強項，四仗只係失0左兩球，全係敗於英格蘭 U21 時所失，其餘三仗，塞爾維亞 U21 保持不失，防守能力甚佳。加上塞爾維亞 U21 上仗0係準決賽輕鬆以 2 : 0 擊敗比利時 U21 晉級，體力上佔有優勢，今仗即使作客，塞爾維亞 U21 仍有機會首奪 U21 歐洲國家盃冠軍，向世界球迷宣示其新興力量。

至於同日上演0既戲碼，就係西甲中游份子0既夢幻對決，西維爾 VS 基達菲，排第三名0既西維爾以及排第九名0既基達菲，角逐今屆西班牙盃0既錦標。西甲上周煞科，皇馬驚險封王，自然實至名歸。而0係今次舉行決賽0既班拿貝球場，將再成為球迷0既焦點，因為西班牙今季最後一項錦標，將會0係星期六晚凌晨四點，就0係呢度誕生。以下係兩支球隊0既賽前分析。

西維爾0係今屆憑藉陣中四名巴西兵：前鋒路爾斯法比安奴、中場丹尼爾以及連拿度，以及後衛艾迪安奴，再加上轉戰西甲後脫胎換骨0既前鋒簡路迪，打出極具侵略性0既進攻足球，成功衛冕歐洲足協盃。西維爾0係今屆西甲0既另一個目標，就係要奪取西班牙盃。即使有機會0係聯賽爭霸，但西維爾明顯0係最後兩仗留力，專心備戰今次決賽，可見呢支應屆歐協盃盟主，渴望成為雙料冠軍，所以唔好因為近兩仗一和一負，而輕視其爭盃0既決心。

至於今屆異軍突起0既基達菲，季初憑主場威力，一度成為西甲主場王。基達菲0既踢法實而不華，尤其係防守力強，今季三十八場聯賽，基達菲同今屆衛冕失敗奪第二名0既巴塞隆拿，同樣只失三十三球，成為西甲失球最少0既兩支球隊。季初基達菲更連續六次主場從未失過波，可見其防線穩固。至於陣中0既兩名土砲前鋒古爾沙以及迪摩奴，反擊力極強。能夠0係準決賽次回合大炒巴塞四蛋，作出絕地反擊，成功將巴塞淘汰出局，可見基達菲0既球員0既鬥志同韌力。基達菲同樣0係近幾場聯賽留力，目標亦係直指呢場決賽，希望首度稱王。

至於本地足球方面，香港足球隊昨日0係澳門運動場舉行0既東亞預賽 B 組分組賽，成功以 15 : 1 狂數關島，憑較佳得球壓倒中華台北，首名出線今個周日（ 24 日）0既決賽，將同輕取澳門 7 : 1 0既北韓爭奪明年決賽周0既最後一個參賽席位。由於港隊首戰對中華台北踢出近年劣作，加上天氣持續酷熱，場內氣溫估計超過攝氏 35 度，賽前十多名專程到濠江捧港隊場0既球迷都擔心，重組0既港隊能否再次重擊「亞洲魚腩」關島，避免只能踢到季軍戰命運。

原來最擔心係最多餘0既，因為港隊甫落場，就發覺世界排名包尾（ 199 位）0既關島實在太弱，球員連基本企位及防守都好有問題；港隊前鋒陳肇麒只花0左五分鐘，就可以揭開大勝序幕，之後就一直圍攻對手，面對儼如紙板公仔0既關島球員，更係一推就就過。締造大勝戰果固然值得高興，不過港隊今仗就再次暴露後防漏洞；0係上半場三十三分鐘，就因後衛文彼得一次大意回傳，被關島前鋒文迪奧拿截得後單刀推進射入，意外地取得今屆賽事首個入球。半場領先 9 : 1 0既港隊於易邊後繼續施壓，之後再入多六球，終以 15 : 1 大勝對手，以淨勝十四球0既成績壓過中華台北出線。

睇到麾下球員成功「達標」，坐0係後備席0既港隊職球員都鬆一口氣；早前僅和中華台北後大受壓力0既新教練李健和，賽後再次展示其招牌笑容。佢話：「球員0係咁酷熱環境下持續向對手施壓爭取入球，佢0地0既鬥志同態度係好令人滿意。我0地一直相信球員有能力攻入關島十一球，而家終於都如願入決賽，而周日0既決賽面對北韓，將0係陣式上作出一0的變動，由 3 - 4 - 3 改為 5 - 4 - 1 陣式，以加強防守應付攻力強勁0既北韓。」港隊球員賽後未有立即返到酒店，而選擇留0係現場觀看北韓對澳門0既比賽。結果北韓輕描淡寫以 7 : 1 取勝，效力川崎前鋒0既射手鄭大世更攻入四球；0係炎熱天氣下面對強敵，睇0黎港隊真係唔易應付。欲知呢場決戰有幾好睇，就要留意今個星期日黃昏六點正，香港 VS 北韓， 有線 61 台足球台直播。