巴克萊亞洲錦標賽

今個暑假，繼續會有好多波睇， U21 歐洲國家盃決賽週、美洲國家盃、特區十周年回歸盃、世青盃、亞洲盃、東亞足球錦標賽預賽、曼聯亞洲之旅、德國聯賽盃、阿積士四角賽、阿仙奴四角賽、賽前熱身賽，仲有跟隨著各式各樣0既轉會新聞 / 傳聞、圖圖盃、歐聯外圍賽、歐協外圍賽等等都陸續展開，真係包羅萬有。不過講到最有睇頭0既，就係0黎緊舉行0既巴克萊亞洲錦標賽。

0係 2007 / 08 英格蘭超級聯賽季度揭幕之前，英超球隊利物浦、樸茨茅夫、富咸以及本港「三冠王」南華將於可容納 40,000 人0既香港大球場列陣，角逐首次由巴克萊銀行贊助0既巴克萊亞洲錦標賽（前身為英格蘭超級聯賽亞洲盃）。呢次錦標賽將於 7 月 24 、 27 日舉行。每日上演兩場賽事。本屆所有賽事均會由 Now Sports 1 （ Now 631 台）於本港、 Sky Sports 於英國以及全球一百個地區直播。

英格蘭超級聯賽行政總裁斯丘達莫爾（ Richard Scudamore ）認為，英超0係東南亞十分受歡迎，而香港亦有十分多球迷支持英超。呢次巴克萊亞洲錦標賽畀每週緊貼英超戰況0既球迷，現場親身感受英超大戰0既氣氛。三支英超球隊將以強陣應戰，角逐呢個聲望越濃0既獎盃。肯定為香港足總盃0既冠軍亦會全力以赴、爭取錦標。

巴克萊亞洲有限公司常務董事關振宇就表示：「香港係一個亞洲經濟樞紐，亦係我0地正在拓展0既市場。我0地好榮幸能夠首次贊助呢項足球錦標賽。巴克萊亞洲錦標賽為我0地0既品牌提供一個非常有效0既推廣途徑，畀我0地接觸英格蘭以外0既球迷。」至於前香港足球總會主席康寶駒，對於今屆賽事0係香港舉行顯得十分興奮：「呢幾年我0地邀請過英超球會來港舉行表演賽，不過呢次係首次將英超比賽移師香港進行。本地球迷將可現場欣賞到高質素賽事。香港足總一直0係主辦外隊比賽都十分出色，無論邊一方面均力臻完美，以確保賽事可以成功舉行。」

巴克萊亞洲錦標賽0既前身，就係英格蘭超級聯賽亞洲盃。前兩屆分別於吉隆坡（ 2003 ）以及曼谷（ 2005 ）舉行。吉隆坡英格蘭超級聯賽亞洲盃0既參賽隊伍包括伯明翰、車路士、紐卡素以及馬來西亞國家隊。當屆冠軍為車路士。亦是車路士現任班主艾巴莫域治入主之後所得0既首個獎盃。至於曼谷英格蘭超級聯賽亞洲盃0既參賽隊伍包括保頓、愛華頓、曼城以及泰國 U23 國家隊。當屆冠軍為保頓。

今屆巴克萊亞洲錦標賽來港參戰0既利物浦、樸茨茅夫、富咸已經落實來港球員名單，本港球迷將有機會現場欣賞巴克萊超級聯賽球星0既球技。利物浦隊長謝拉特將帶領紅軍來港，隊中更包括新加盟0既西班牙球星費南度托里斯。此外，謝拉特0既英格蘭隊友高洛治、加拉查，以及前阿積士球星巴布爾均會隨隊。

來港獻技0既三支英超球隊中，最為球迷熟悉0既相信係實力強勁0既利物浦，呢支擁有大批本地球迷0既球隊，曾於 1983 年以及 2003 年兩度訪港，轟動本地球壇，為香港足球歷史寫上光榮0既一頁。 1983 年 4 月，當屆總督盃以及足總盃雙料冠軍0既寶路華宣佈主辦利物浦，賽事於 6 月初舉行，0個次係利物浦首次訪港。當屆利物浦戰績彪炳，球隊於季初勇奪慈善盾，接著贏取聯賽盃以及甲組聯賽冠軍，成為三料冠軍，陣中擁有多名國腳級球星，除0左球隊首席射手威爾殊國腳魯殊因傷未隨隊外，其它球員均悉數來港。兩支球隊為角逐當年0既維他盃以及 15 萬元0既獎金，均以強陣出擊，最後利物浦 2 : 0 擊敗寶路華，奪得維他盃錦標。首次訪港0既利物浦，0係球迷心中留下一個深刻印象。

樸茨茅夫0既領隊哈利列納，0係今季轉會市場都非常活躍，一口氣簽下七位新球員，均會全數來港，包括新晉英格蘭國腳紐根特。紐根特今年 22 歲，為彼斯頓上陣九十四次，射入三十三球。三月時首次代表英格蘭以後備身份上陣，更為英格蘭射入一球，助球隊以 3 : 0 擊敗安道爾。樸茅大軍更包括英格蘭球員占士、蘇甘寶、喀麥隆後防羅倫以及加納國腳梅達利。至於富咸將由新從西布朗以六百萬英磅轉會費加盟0既卡馬拉帶領攻堅。其餘0既新加盟球員希利、艾朗曉士、史堤芬戴維斯、比特及高捷斯基，將會跟隨呢隊西倫敦球會來港獻技。

今屆巴克萊亞洲錦標賽，首日初賽由樸茨茅夫對富咸，紅軍利物浦會迎戰南華，而次日賽事會由首日兩支負方球隊爭奪季軍，並由首日兩支獲勝隊伍上演王者之戰，角逐盟主寶座。 Now Sports 1 （ Now 631 台）將會獨家播放呢兩日賽事，屆時會以高清播放，更會用多達十四支攝影鏡頭拍攝整場賽事。由 7 月 22 日各球隊訪港開始，就會全程貼身追蹤各球隊備戰情況。 7 月 24 、 27 日，香港大球場見！