網誌分類：足球就是我舞台 |
各位球迷，英超旋風襲港全面睇開始同大家見面，由以下呢篇網誌起，我0地請0左兩位特別嘉賓主持，為大家介紹巴克萊亞洲錦標賽0既最新資訊。我唔阻大家，將以下0既時間交畀 Now TV Girl – Elise ！
「 Hello ！ 我係 Elise ，第一次同大家見面。由今日開始一連三日，我將會同大家介紹今屆0係香港舉行0既巴克萊亞洲錦標賽。今年已經係英超球會第三次0係亞洲舉行錦標賽，而香港呢一站更加係首次有本地球會–南華參加競逐（ 2003 年吉隆坡站參賽係馬來西亞國家隊、 2005 年泰國站參賽泰國 U23 國家隊）。」
「今次比賽波飛已經賣得七七八八，相信0係 24 號上演0既第一日比賽0既尾場南華對利物浦0既時候，現場球迷將會令可以容納 40,000 球迷0既香港大球場變成一片紅海（南華以及利物浦同係以紅色為主場色）。為將英超球星場上0既風采，毫無保留咁搬到電視機觀眾0既面前，今次賽事將總共動用十四部高清攝影機，放0係球場每一個角落，係香港有史以0黎用最多攝影機去拍攝球賽，而其中一部主要近距離捕捉各個球員0既動作同表情，務求可以捕捉到謝拉特、費蘭度托利斯等球星0既一舉一動。」
「0係十四部攝影機當中，其中兩部係流動攝影機，除0左捕捉整個球賽之外，仲可以拍攝場內球迷0既熱烈反應，或者去到球員通道甚至更衣室同一眾球星作近距離接觸，畀球迷可以睇到一班球星0係球場之外0既有趣一面。聽日將會繼續介紹今次賽事0既有趣資料。」
特別鳴謝：
蘋果日報提供以上稿文
