攪乜鬼旅行?

自從病了以來，同家人相聚是我最大，最大的心願。因我感到每天都是生命的最後一天。

復活節長假期開始，我同家人一早約好去短線旅行。

10/4 一早，去到大圍火車站聯同家人一齊去深圳 ~ 華僑城旅行。８點左右去到深圳火車站，嘩，人山人海 ~ 迫到水洩不通，場面非常混亂。

寸步難行，有很多團都在深圳出發，所以真係慘，由於有老有少，所以我哋坐下來食了早餐先再算，反正，都是在深圳遊下之嗎！

１０點多人群差不多都散了，我們就坐旅遊車（因為包團所以比較自由）向華僑城出發，去到要坐車上山，啲小朋友就好祈望有好多嘢玩，一行人都很開心。

上到去差不多１２點，又係人多到震，全部都係 ~ 香港團，我哋因為要自費午餐，所以排隊買 KFC ，點知都要排一個多小時先有得食。真慘！

下午５點要回程了，我哋要排隊搭車落山，點知人龍有成５個 S 咁長，排咗成個鐘導遊先話可以叫旅遊車上嚟接我哋，車！你唔好今晚先講！ 我妹夫話都排咗咁耐，不如落去同啲細路坐吊車啦！（因為响山上有吊車坐落山嘅）咁我哋唯有又等啦！好啦！落到去 ~ 原來無吊車坐，又要排隊坐車落山，人龍有７個 S 咁長，比你 ~ 火都嚟啦！個導遊仲話人太多要排隊佢都唔想0架！佢都無錯啫！咁實係我哋一家人錯囉 ~ 好地地去咩鬼旅行，仲要跟呢間咁嘅 ~ 鬼旅行社添！

原本嚟旅行開開心心，點知激到一肚氣！排隊排足成日，上山又排隊，食嘢又排隊，落山又排隊，真係辛苦死啦！

個導遊仲講：原來無咗吊車幾個月0架喇！

唔係呀！咁都得，又唔早講，得我哋排咗成４個鐘先落到山，落到嚟成個華僑城啲燈都熄埋，咁我哋點去停車場呢？個導遊就話無接駁車啦！不如行落去啦！

唔係呀！有老有少以為短線團會舒服啲，點知辛苦過行路去廣州呀！無法啦，都要行啦！都要去食飯0架！去到餐廳成９點了，仲唔嗱嗱聲食飽返酒店沖涼呀！

第二日，都無咩行程，有人已同導遊講咗要去行超級市場 ~ 沃爾瑪，個導遊又唔知車咗我哋去邊？　佢真係好嘢，車咗我哋去沃爾瑪嘅 office ，邊有嘢行呀 ~ 大佬？好啦！我哋唔夠你玩啦！車我哋返關口，我哋都係早啲返香港喇！

以後都唔好再攪我啦！仲辛苦過返工呀！