知道媽媽好

呢兩日真係好攰，因為 ~ 咳，所以睇咗兩次醫生，仲食緊藥，估計要食到星期五，真希望快啲好番．

今日老公返夜班，唔返屋企食飯，只有我同阿囡响媽媽屋企食飯（媽媽終於返咗嚟啦），所以只有我同囡囡坐車返屋企，阿囡突然對我講：媽咪，你真係好！

點解佢咁講呢？原來．．．每朝，佢都要搭保母車返學，佢都會見到一個媽咪帶住兩個小朋友等車，呢個媽咪係咁樣同佢個小朋友講嘢嘅．．．

媽：快啲食埋個飽啦！（個仔就猛咁咬個飽）

媽：仲唔飲啖水！（個仔又急急咁飲啖水）

媽：你個書包點解條帶咁0架！整下佢啦！（個仔又嗱嗱聲整書包帶）點知點整都唔合阿媽心意，於是．．．嚟啦！我同你整啦！你隻手點0架！咁樣我點幫你整．．．．．

就係咁，我個囡就同我講：呢個阿媽，係咁叫佢做呢樣，都未做完，又做第二樣，對住佢真係辛苦．你就唔同呢，你都唔會咁樣．

我聽到呢度，個心真係好甜，以前，我成日以為我唔識點做人阿媽，因為，管得太多，太嚴，對佢要求太高，又會令小朋友反感，如果唔理，放任佢，又唔得，真係好難搵到親子關係嘅平衡．

其他可能佢大個女，識得知道，我如果每次忍唔住要出聲”話”佢，佢就真係好曳0架喇！

不過，依家佢咁講，證明我做媽媽，都算合格掛！