無聊列席會議的一天

06/Nov/2007 星期二
晴天, 風和日麗
      

今日 09:45 返到公司, 一返到公司已知百佳阿頭唔係度, 但原來佢一早就去了個客開會, 哈哈...還以為有大半日冇人煩, 點知開了電腦冇耐, 百佳阿頭就打電話來, 話叫我陣間上另一個客到開會, 更要我帶齊一切資料上去, 嘩...雖然只係 4 款樣辦, 但分拆出來的款式加加埋埋都有近 20 個, 要我一次過帶齊上去, 咪拎死我...!!! 雖然我有表明係咪真係要帶哂全部, 但百佳阿頭卻一於話之我幾辛苦, 死到要我拎哂 d 文件, 唉...一日新工未有著落, 我都忍你...!!!

執齊資料 12:45 我便先行出發, 而有份去開會的艾力陳就搵籍口話有野做, 佢會食完飯才過去, 本來百佳阿頭叫我飛我過去齊齊食午飯, 但我的銀根已真的用我七七八八, 為免真的攪到冇錢用, 都係坐巴士過去個客附近, 再行去酒樓同佢地食午飯好過, 最後我 13:20 才去到那酒樓, 食完野就上去開會, 上到去艾力陳已到了 10 分鐘, 14:45 就開始開會, 由坐低一刻開始我都想不明叫埋我來做什麼...??? 所有野基本上都斜百佳阿頭講哂, 真係唔知我可以有乜野講, 而且一直只坐冇野做, 冇野講, 攪到我坐坐下已有點打瞌睡的情況, 最後都要出去洗了 2 次臉才頂到 17:30 開完這個我覺得好無聊的會議.

離開個客的辦公室後, 阿頭與艾力陳就返公司, 百佳阿頭見就 18:00, 話我可以不用返, 我聽到佢咁講梗係唔返啦...!!!因我要趕去紅磡 Second In 上星期五的那份工, 佢地一上的士走了之後, 我就開始出發去紅磡, 坐巴士去到紅隧轉車站就落車, 之後就行了去新公司見工, 一上到去就見個 General Manager, 我又係似上次一樣講解我之前那幾間公司是做什麼, 負責什麼, 之後就轉了個 Marketing Manager 入來, 我就好似錄音帶重播咁, 將頭先講的說話重覆一次講解俾佢知, 見埋佢之後, 又換返頭先個 General Manager 入來, 佢講了幾句之後就叫我走先, 因佢都要向法國老闆再傾傾是否聘請我, 這全因我的英文真的是非常有限.

一落到樓, 她好似知我已見完工, 我一將電話 Set 返去響聲, 她就打電話來, 本以為見完工我會有喜悅的感覺, 可是我卻有點失落感, 雖然不知為什麼, 但我一路行去坐車回家, 一路都有這感覺, 而她卻話估到是什麼, 但就要陣間放工我見到她時, 才告訴我知, 傾了 10 分鐘她因要工作而收了線, 之後我與肥佬黃及粗眉曾講返頭先的見工情況, 肥佬黃就勁話應該會請我, 但我就冇講我有失落的感覺, 而粗眉曾仍堅持叫我唔好去做, 因佢曾係這公司做過, 知道我的英文會係這公司的障礙, 就算真的請了, 與老闆溝通唔到, 也不會做得長, 傾完這 2 個電話之後, 我就繼續邊行去巴士站邊想我何解有失落感...!!!

本來打算直接回家食飯再去接她, 但袋裡的文件實在太多及太重, 最後決定都係拎返公司先, 順便都做點野才出去好過, 打了電話俾媽媽通知佢留飯我就坐車返去公司, 20:55 便返到去, 百佳阿頭見我返了來公司, 也感奇怪, 我只答佢袋文件太重想拎返來先, 佢就返了入房執野走人, 我就覆埋 e-mail, 打埋個電話上去俾大陸慧之後, 我才離開公司去坐車接她, 原來我以為我 21:40 才離開公司, 實會遲了去接她, 事先也 send 了個 sms 給她, 可是最後我就可準時係 22:00 去到中心樓下等她.

等了近 20 分鐘她便打電話給我, 話已落到商場, 今次估她係升降機那邊來, 點知她係商場中心下來, 真的次次都估錯她落樓的位置, 總是未能給她驚喜的...!!! 與她一路係回家的途中, 她到一路講解點解我有失落感, 這全因見工時那個 General Manager 及 Marketing Manager 多番有質疑我的英文能力, 從而令到自己冇了這信心去做這份工所致, 經她這樣一講也確實令我想通了點, 不知是否因此打定輸數佢地唔會請我, 反而心情反而開心了好多, 回到家媽媽一見她就雀躍起來, 更將之前為她留起的湯水, 係雪櫃拎返出來翻熱給她飲...!!!

00:00 上日記網留位之後, 我就將電腦讓了給她用, 而我也遵守回家之前約定, 留了位之後就冇再要求用電腦, 她與朋友傾 msn 時, 我就出了廳去睇妙手仁心 III, 睇完之後我就去沖涼, 之後就到她, 02:20 我就熄埋電腦上床睡覺, 明天下午要返大陸, 不知要攪到幾點才可回來...!!! 唉...我依然掙扎緊是否係後著 (見成工) 之前就與阿頭攤牌, 我有這想法也全因她與問題真都覺得我一直唔辭職都係因我依然眷戀現在工作的地方近屋企, 同埋工作的運作模式是我建立出來, 但我又知我一日唔攤牌, 一日都唔會完完全全去積極搵工走人的, 不知我這優柔寡斷的性格, 是否也遺傳自爸爸的呢...???