頻撲的一天~

今日又係要一朝早仆出去in,我發現自己in親都係港島區,真係勞民傷財~

唔計時間淨計車錢來回已經廿蚊,in多幾次唔請真係蝕晒大本!!

因為要自己影印埋學歷同工作證明果d帶過去,我就預早起身出門口前影,

點知印到第二張就無墨,搞左好耐部機熄過再開都係唔肯印話無墨,

咁我唯有死死氣照出門口,出到去又剛好走左部巴士,轉船又剛好走左架船,

最後遲到十分鐘,又要人地幫我影印,跟手仲發現自己留左張工作證明響屋企部機度!!

我都唔知今日發生咩事? 點解好似頭頭碰著黑咁既?

跟住都一場去到,梗係in埋先啦~見到有個女仔同個職員講話佢睇錯日期,

本應昨日in的,但係佢睇錯左今日,但係佢就算係咁都有得in,因為有人臨時甩拖唔黎!

見工真係咩人都有~

今次份工其實係做d好似人口普查咁既工作,要出外勤,兩文三語,最好識其他方言,

咁我去到又係三個面試官,佢用英文問我做左d咩準備,我真係呆左!

我好老實咁答我只係影印左d文件同帶相黎>.<||(我真係唔知應該點答呀~~)

佢再問我知唔知份工做咩,有無搵過有關資料等等,我就講返招聘廣告d內容出黎,

同埋上網問過人有咩要求,但係網上d人都有申請,所以知情既都唔願講,

只係知要考兩文三語咁.

跟住問時事題(in政府工一定要睇新聞!!),居然問我雷曼迷你債券覺得邊個要負責任!

我就話d錢係投資者,佢地唔睇清楚就投資,輸打贏要,自己d錢都唔睇實,所以責任最大,

其次銀行唔管好自己d職員,向阿婆阿伯sell高風險產品,無培養無道德操手所以責任次之,

至於政府,明知保險行業呢個問題由來已久,家下銀行撈埋保險都可以唔管銀行,有責任但最小~

我其實唔知佢想要咩答案,不過我只係有果句up果句,

再問多題應變題,佢問我如果派到去個地址係"一樓一"咁我會點做?

我就話會打返總部問指示,佢就問除左問總部之外,自己會唔會入去?

我就話如果覺得附近環境安全既話,都無咩所謂,反正都係做野姐~(其實咁答啱唔啱?)

考交通題就最x難,我住九龍佢就問我新界咩村去咩村你會點去? 我真係連咩村都未聽過!!

最後到普通話題俾段野我讀,讀到甩甩咳咳,自己讀完之後心都淡埋,

佢最後就問我識唔識其他方言,好似潮州話之類果d,我就話客家話識聽唔識講,

佢就問,你係客家人? 我就話係~跟住問我有咩問題,我就問左d同派去地區既野,

就係咁,個面試終於完結~

佢唔請我都唔會有咩遺憾架啦~佢既要求實在係太高......

-------------------------------------------------------------------------------------

in完之後返到屋企開電腦,見到勞工處有份政府工啱,最重要係下午仲有位!!

於是我就第一時間沖去要求轉介,拎左個見工時間,哈,真係啱啱好,

係我拎BNO果日去港島in!

去完勞工處出到黎有時間當然係去黃金買墨啦!! 連學歷都印唔到真係谷鬼氣!!!

買一黑一黃兩個墨都用左差不多二百元,好x貴!!

---------------------------------------------------------------------------------------

返到屋企都已經5點,有個好耐無見既同學打黎話辭左職,咁得閒就約出黎,

去左旺角食飯吹水,跟手經過書局入左去買紙~~~

再返到屋企時已經係夜晚了,今日真係過得好充實~~