第30週~第4次產前檢查@廣華醫院

今日約o左10:50返廣華覆診,同老公買o左早餐上車食,去到廣華,時間o岩o岩好,今日又係好多人呀!!!!擺抵o左覆診紙,就坐o係大堂等叫名,之後驗小便,量血壓(今日血壓124/66mmHg,脈搏96/min)同磅重,今日又重o左啦!早兩日磅都係60.6kg,今日就61kg。磅完重之後,又o係大堂坐,今次等o左好耐呀!起碼有成個鐘呀!見o的人陸續走哂,都未到我o地,不過今次睇我個係女醫生,個個都睇好耐,差唔多到12:45先至到我o地,入到醫生房,就上床俾醫生摸肚檢查,聽BB心跳,初時連我自己都聽唔到呀!嚇屎我啦!後尾姑娘換轉第二個位置就聽到啦,不過好細聲!醫生又問我有冇哮喘發作,我話冇呀!又問我食唔食得,我話OK呀!不過我個肚上方成日都扯住痛,同醫生講,醫生摸完肚又話冇o野,咁就算啦!之後落床,交返上次o係胡寶星夫人中心照3D超聲波份報告俾醫生Keep record,醫生睇完都話BB正常,冇事,係子宮有個1cm大o既肌瘤,我問醫生有冇影響,佢都話冇,最後就俾o左張驗血form我過對面抽血房抽血,都係例行檢查血色素同血糖。出o左房之後,老公就去o左約期,我就去抽血,今次係個技術助理幫我抽,佢摸一摸條血管就抽到啦!一針見血,好手勢呀!!抽完血o岩o岩一點鐘走得!

下次約o左3星期後返去覆診,即係30/11!到時已經33週啦!