Happy Valentine Day ^.^

今日係我婚前最後一個既情人節...明年已經係人地既老婆囉!
不過我唔介意未來老公繼續o係情人節既時候送上驚喜比我架~
不過今年既情人節比較失色左少少...點解
由於未來老公每逢星期四晚都要返夜既，剛巧今年既情人節係星期四，
所以佢就冇時間陪到我囉~
沒有辦法啦...工作要緊，我作為既未來老婆都會體諒佢~

今日返到公司我已經十分期待，就係等緊下晝個餐飯，
因為老闆A貨媽咪Mabel請食飯(唔知算唔算係春茗呢?)
咩叫做A貨媽咪--事關我未來老公之前係同我同公司做野，
而我既部門就隸屬Mabel，而佢既部門就隸屬佢既A貨媽咪Margaret(奶奶)，
佢地兩位都好照顧我地(就算未來老公走左Margaret都好關心佢，
而且佢地兩個時時都有好多話題傾)。
我就更加唔需要講，一有咩事就找A貨媽咪傾計。

終於到左食飯時間，本身我地諗住食日本菜，點知間食店既座位分散晒咁坐，
A貨媽咪唔喜歡，所以就走左去食Outback Steakhouse呢間食店既野食好味，
不過就好heavy，如果夜晚一大班朋友齊齊食就會好好多~

食完之後已經朦朦地，可能太飽既關係啦~
時時過黎偷野既田少同甚少過黎既Alex突然出現，
田少同Alex異口同聲講過去佢部門，我就一心以為又要玩魚蛋戰**。
跟住我個位既電話嚮起見到係接待處打黎，之後田少講左一句出去收野啦!!
出到佢接待處，未來老公派花店送左一束花黎，而且我最愛既玫瑰同火百合呀!!
嘩...攪咩咁多人企晒係度呀?原來班同事想睇下我收花既反應
講真我表面反應好似冇乜野，其實個心就開心到死!!
(**魚蛋戰玩法: 髀牌鬥大細，邊個抽到最細既就要出$20元。)

放左工之後我就走左去整指甲個度卸甲，因為有反甲既情況出現，唔整唔得!
攪左成個鐘，我啲手指終於回復正常，而且方便好多。
不過卸甲過程其實都幾傷而且令原身既指甲薄左，所以要好好保護。
卸甲之後我就返家煮ABC湯年糕作為晚餐，一路等未來老公回家。
終於未來老公返左黎，我立即送上一個香吻給未來老公多謝佢送了那麼靚靚既花。然後再同花花黎一個大合照(大家可以順便睇埋我新屋既樣)

GK在此祝各位

情人節快樂
每日甜甜蜜蜜