有感而發

唉，姣婆守唔到寡，手痕又打下BLOG。

近日帶團途中忙到不停，由８月尾一直未停過咁帶，帶到今日已經４０日沒有休息過了。超累的，但亦好充實。有睇過我ＦＢ的都有見到，１０月係紅葉季節，可以去雪嶽山、全州等等地方睇滿山紅葉。

月頭唔夠紅，月中再去，月尾、１０月，一個禮拜去一次，要點影都得～

日前網上熱播一段面盆短片，令我有很深體會。

發覺而家的人開始變緊，以前帶團的時候，你話去邊就去邊。
遲左一兩分鐘ＳＯＲＲＹ前ＳＯＲＲＹ後，
一齊玩一齊食，仲要買野俾工作人員食，幾十個人同一個思想，
臨返香港時唔該前唔該後，服務費仲會有額外小費。
揮手道別，個個依依不捨。

而家的客路，唔係講全部，但係越來越多人有自己的思想，
將自己的思想放到好大，大到唔需要理會其他人。
約９點正集合，９點３到唔覺得係遲到，９點半都認為係準時，
思思然咁行過來，仲問：「仲有冇人未上車呀？」
跟個旅行團，但好似自遊行咁，鍾意幾時離團就離團，
幾時返就幾時返，仲要同你講：「等我返來先好去邊度邊度喎」
話唔會等的時候，可以同你講：「明明寫第三日先去，做乜改呀？」

而家的人，越來越欠缺一種叫「易地而處」的態度。
永遠覺得自己岩的話，唔需要理會人地做乜，諗乜。
總之跟得到自己的路線去行便可以。
當其他團友希望導遊加遊景點時，
自己不參加，不要緊。
仲要令到其他團友都沒得去，先至心安理得。
仲要返到香港講大話力數工作人員不是，
連自己搭錯貴的士，都可以話導遊沒說明，令我搭錯。

記得以前媽媽鬧過一個人：

「咩呀！？而家有個臭錢大晒呀！！！？」

當時我覺得有個錢都真係幾大，佢起碼肯駛錢，惡得起。

但係而家最惡的，並唔係有個臭錢的人了。。。。

最惡的往往是連個臭錢都沒有的人。