到左韓國喇!

咁多位你地好嗎？我終於到左韓國喇！

零晨機出發，到達韓國的仁川機場是清晨的四點三十二分，入境暢順。拎左行李之後出左玻璃門後，就同埋我的同行同事一齊先食左個麥當當（因為機場好多舖頭未開，車又未有），原來韓國的麥記叫餐的話汽水可以加飲的，但係晨早留留又飲得幾多丫。之後出到出面等巴士，韓國現在真的好凍，應該有零下六度左右。

上左巴士坐左大約一個鐘頭車，便到了我同事的家的附近了。她的家住在地下一樓，因為零晨機實在太過攞人命，兩個人放低行李就訓死左，我就梗係訓地下啦～　但係韓國的暖氣係由地下發熱的，所以訓地下都係好舒服。

大約訓到兩點鐘左右（香港時間係一點，韓國係快一個鐘頭的），起身先出去食左午餐，去到附近的一間烤肉店，食完呢一餐之後，先開始知道自己已經來到韓國呢一個我新生活的地方了。在這一年可能會好吃力，亦可能會好輕鬆，一切都在未知的世界等待我去前進。是的，這感覺就好似以前做領隊一樣，前路模糊但又緊張刺激，當所有的事都有機會在下一天發生的時候，下意識地便開始和自己講：要做回以前的我了。辦公室的自己在韓國已不能再活用，差不多可以話完全不管用了。

食完午餐，同事便先帶我去公司見一見人打招呼，原來她住的地方離公司只有十分鐘路程，可惜現在只係暫時住在她那裡，如無意外兩個禮拜左右便要搬去附近的地方了（還要現在租金貴了少許）。之後買了一張韓國百達通，坐地鐵去新村認認路，因為往後的日子來的頻率都頗高呢。還買了一條牛仔褲，日本很出名，韓國買了代理權所以平很多。

到了晚上去了朋友家吃飯，大家叫了Pizza Hut，談談明天開始的工作，亦不忘談談領隊時代的往事，念念舊。原來不經不覺大家已經相識了四五年，工作台上一起工作，離職，再由外地一起工作，有這些朋友，夫復何求！

不好意思，唔知係唔記得帶定放在行李的某角，用來Upload相的USB不見了，所以影了一些相片給大家（作証？）都暫時不能看。因為明天要跟一個團學習，所以兩日都用不到電腦，亦買不到USB，過幾日再分享。

12:30am了，零晨三點要起身！再談。