HKOC錦標賽--石龍拱

11月15日(SUN)

今日第一次參與去玩野外定向 (雖然廿年前玩過一次，但志在參與，而且事隔咁耐都唔記得了) 。比賽規則好簡單：
1.  賽員必須順序到訪所有其賽程所定的控制點，以時間最短者為優勝。
2.  除賽會提供之地圖及以上提及之裝備外，賽員不可使用任何輔助器材，違者將被立即取消比賽資格。
3.  賽員必須順序到訪其賽程所列的所有控制點，以所用的時間計算成績。

放大圖

雖然第一次玩尋寶遊戲，但持着自己有行山又跑步，一下子就報了difficult level –M21(幫Wahwah報埋一樣) 。怎知個中慘況簡直不外人知，而且人生中第一次比賽不單止被DQ咗，仲要連成績都冇，心情跌到谷底！

野外定向十一時開始，在石龍拱舉行，查過地圖，原來再元荃古道那邊，兩三年前去過一次。從其他blog知道去到賽事中心要上半個鐘斜先，頗為辛苦，所以預早了些時間，不過上到去，病病地的Wahwah已經面色蒼白，好氣喘，傾完一輪都話照去。(都係衰硬頸)

報到完發覺原來同組都是一向玩開的，而自己則是初哥(當然Wahwah係初哥中嘅初哥)，於是即時向身邊的阿叔、阿姐、小朋友學嘢！

開賽前影張相先，咦，Wahwah腳邊有嚿米田貢！後來發現原來賽區更多！

出發前每人有個計時器 (俗稱E-card) ，套在手指上，去到每個point就拍一下，可以記錄時間。

由賽事中心去到起點要再行一公里上山，原本打算跟下啲高手玩頭兩個point，點知原來自己係第一個出發，即係冇得跟，後面選手就隔一分鐘出一個，而Wahwah遲我23分鐘才出發。

一出去跟着地圖方向去，很快很順利的找到Point 1和Point 2，一下子心雄不分東西南北就繼續，搵下搵下，終於給我找到，不過是Point 6！(紅色箭嘴)

咁即係錯晒，唯有喇喇聲返轉頭去搵Point 3。結果在那裡兜了廿分鐘都搵唔到，仲差點拗柴，EQ低到呢，心忟到死，終於出絕招---捉住幾個細路問！

憑着平常心，竟然好順利去搵到Point 4至Point 9，興奮症又發作，想下山跟條山路去Point 10，竟然衝入叢林，一路落，越落越唔對路，點解啲人係對面個山嘅？而且周圍都係樹，連落腳位都冇！天啊，又決定錯咗！心慌慌決定返轉頭上返山，有幾次直情扒在樹林中，一路上一路播開啲樹，播下播下，咦，點解好似唔見咗嘢嘅？再睇下隻手，哇，隻E-card唔見咗！冇咗E-card，即係DQ咗！呆咗兩秒，即刻四周園搵！兩分鐘後決定放棄，因為四周實在太多植物，逃生緊要！