Daddy,我要去海棉公園

海洋公園呢個地方，珈瑋唔係未去過，不過當時年紀尚少對佢黎講無咩印象，不過我就好記得當年係水母館初開幕，人山人海，無啖好食時去，直至現在我仍記憶猶新﹝果種慘況﹞；所以一直都無咩好特別提議帶珈瑋去玩。

而珈瑋亦每次我同佢講帶佢去海洋公園睇熊貓佢都話唔去，Daddy曾經因工作關係係海洋公園攞埋資料，攞埋貼紙比珈瑋，佢都一一拒絕。直至早兩晚珈瑋係Joyful返學，經過一間旅行社，佢見到一張印有迪士尼圖片的香港旅遊簡介，係我同意下佢攞左一張黎睇，之後指住迪士尼、NP360、天壇大佛呢d圖片同我講﹕[呢d去過啦!]，再望住海洋公園個過山車好疑惑咁，我就同佢講呢度係海洋公園，你想唔想去?佢望左好耐再同我講﹕[唔去!].....ok，我唔迫佢!

一覺瞓醒，佢又攞住呢張簡介黎同我講﹕[Mami，我想去呢度!]﹝海洋公園﹞，我當然答應佢啦!之後上網check下d資料，打電話比Daddy同佢講星期日要一早起身，因為珈瑋想去海洋公園，Daddy都覺得好奇怪，突然珈瑋想去海洋公園呢個要求，Daddy當然會答應啦!

點知到晚黑，珈瑋叫我幫佢打電話比Daddy，電話一接通，珈瑋就話﹕[Daddy，我想去海棉公園呀!............................]﹝唔係我打錯，係珈瑋講海棉公園，我好努力去更正，佢亦好努力去講海"洋"公園!﹞[我要玩過山車!...........]Daddy聽到珈瑋打電話比佢當然心花放，咩都答應啦!

我?忙啦!珈瑋一個要求，我又要搵地方比佢食拉麵，又要Book位，又要睇地圖，又要揸車過我最怕行的紅隧!海棉公園，闊別多年，我地黎啦!!!