大鄉里出城

Sept 11, 2009 (Fri) - 大鄉里出城

真係想講下呢間Shakey's Pizza. 唔知係我冇返香港耐大鄉里定咩呢, 呢間嘢就真係特別.

第一:
本來想係度切埋蛋糕. 點知要收HK$50"切餅費". "切餅費"!!!! 真係大鄉里,第一次聽. HK$50? 傻架?

第二:
個服務生女仔(A)落單, 咁我地(B)咪睇住個餐牌叫囉.

B:"唔該一個美式芝士焗脆薯"
A:(望一望個餐牌)"係!"
B:(好快地轉去下一頁) "一個喜客至尊"
A:"....幾號呀?"
B:(...唔係嘛, 幾號?...算!)".....2號, 咁唔該再比個54, 61..." (終於以號碼落完我地?order, 關上餐牌)
A:"我重複一次你地嘅order, 2號, 54..."
B:(我真係真係當堂眼都大埋) "等等!!" (立刻打番開個餐牌) "ok, 講啦"
.
.
佢行開之後, 我每一時間問我個妹,"唔係嘛, 用霖把重複order?"
我個妹,"算啦, 我唔係第一次遇到架喇..."
立刻想起我至愛的McDull, 原來佢咁受人喜愛, 係因為佢夠真實, 每天都活在大家的身邊.

第三:
食物到, 但同想像中唔同樣. 問清楚好d.

B:"唔該, 呢碟係咩黎架?"
A:"....等一等呀"
B:(唔係自己d野食咩樣都唔知呀? 另一個個樣高級d嘅行埋嚟, 以為佢會知啦. 點知, 佢打開個餐牌搵)我地叫咗個美式芝士焗脆薯, 係咪就係呢個?
A;"...應該係."
B:"...咁..ok啦, 算啦...食啦食啦"

第四:
埋單, 我行先, 叫個妹check下佢地有冇扣我地張coupon同收切餅費先.
點知, 個妹話, 佢張單居然得item, 但冇$ breakdown, 得個總數.
咁埋單黎個姐姐, 就更梗係唔知啦, 叫佢去check, check十年番黎, 都係唔sure. 死唔死. 不過我地大約計一計, 都應該係咁上下就算啦. 趕時間呀, 門口兩個大帝已經玩到癲晒失控.

總括來說, 其實佢地服務態度同食物都ok. 相信只係間公司?制度問題同訓練不足先有呢d嘔血野出現.