Yes~! 再戰蘿蔔糕之 － 呢底蘿蔔糕仲正呀~ ^0^(附食譜)

Yes~! 再戰蘿蔔糕之 － 呢底蘿蔔糕仲正呀~^0^

呵呵呵~ 昨日落雨，所以留番喺屋企，全日就係玩蘿蔔喇~

今次我改咗食譜，買咗七斤蘿蔔嚟整蘿蔔糕~ 仲無無聊聊

拍埋段片，介紹整蘿蔔糕嘅過程呢~ 但就唔係全程影曬，

冇計啦，玩自拍係有所限制o家喇~ ^0^

我係拍咗同蘿蔔刨皮，跟住刨蓉同刨絲嘅方法，仲有係撈

粉後嘅稀杰度，蒸糕後嘅甩模方法，但而家條片仲剪輯緊，

Hee hee hee~頭先顧住玩Facebook Farmville，所以條片

剪到唔上唔落又停咗手呢~ 睇吓晏少少呀老爺比唔比我用

佢部電腦先~ 事關要佢部電腦先有影片剪輯軟件呢~^e^"

今次呢底蘿蔔糕真係好good呢~ 入口即溶，我而家明白點

解我位母親大人用鬆化嚟形容蘿蔔糕喇~ 蒸完我將佢雪凍

後切件，跟住煎香佢嚟食，糕面好香脆，食落入口即溶，

好幸福啊~ 你哋快手整番底嚟食啦，好想將呢份幸福感

傳送比大家啊~ (呵呵呵~想體驗呢份幸福感，係要親自

動手先可以感受到呢~ 唔好叫我做速遞呀吓~ Wakakaaaa~)

今次呢個食譜同上次嗰個嘅最大分別係粟粉改咗用澄麵，

而蘿蔔同埋其他配料加大咗，份量如下:

蘿蔔7斤(5斤半刨蓉、1斤半刨絲)

粘米粉 570g(粘米粉份量可因應粉漿稀杰而有所增減，

但差別應該只有20克左右)

澄麵 60g

呢個份量可以做到六個6吋糕盆

【小貼士】

蘿蔔刨蓉後，蘿蔔糕會更鬆軟，同埋刨蓉後的粉漿較易

杰身，因為蘿蔔蓉會抓緊粉漿，而另外再一部份刨蘿蔔

絲，食起上嚟會見到蘿蔔絲，質感會更佳．

哈哈哈~ 諗諗吓都係將個食譜加番落嚟呢樹喇~ ^0^

如果唔想做咁多份量，可以將下面食譜份量全部減半

即可~

材料:

蘿蔔7斤、李祥和粘米粉570克、澄麵60克、冬菇16隻、

臘腸4條、瑤柱4粒、蝦皮100克、蔥適量

調味料:

鹽3茶匙、糖3茶匙、胡椒粉2茶匙、蠔油4湯匙

做法:

1)蘿蔔5斤半刨蓉，1斤半刨絲，蘿蔔滲出的水要保留備用

2)瑤柱浸軟後撕成絲(或可用小型攪拌機打成絲)

3)冬菇浸軟切粒後，拌入3茶匙生抽，1茶匙糖備用

4)臘腸切粒備用

5)將蝦皮用筲箕"犀"走雜物，然後用清水洗淨，跟住隔去

水份，白鑊烘乾蝦皮(用慢火)，待蝦皮乾身後將蝦皮推開，

待鑊中留一個空位，落油，爆香一片蒜片，待蒜片轉微微

金黃後，將蝦皮推回鑊中同炒，咁蝦皮會變得更香(如不選

用蝦皮可用蝦米代替，而蝦米處理方法，只須洗淨，白鑊

烘乾備用，而爆炒材料時將蝦米加入一同爆炒，但如選用

蝦皮，則不須同其他材料再爆炒)

6)燒熱鑊，加入冬菇、臘腸粒、瑤柱絲一同爆炒，炒至出

香味盛起備(如選用蝦米，則此時一同加入爆炒，但若選用

蝦皮，則不須再加入爆炒)

7)爆炒料頭的鑊不用洗，放入蘿蔔蓉及絲及蘿蔔水同煮，

煮至蘿蔔轉軟後加入調味料，熄火約2分鐘後分數次將

澄麵及粘米粉篩入蘿蔔絲裡拌勻，最後將冬菇、臘腸粒、

瑤柱絲、蝦皮加入拌勻，但要預留少許材料鋪上糕面

8)把所有材料倒進已掃油的糕盤裡，大火蒸1小時，最後

趁蘿蔔糕尚熱時，灑上蔥粒即成

【小貼士】

1)蘿蔔糕放涼後置於雪柜冷藏(放入普通格即可)，已冷藏
的蘿蔔糕會易於切件

2)今次我選用蝦皮，因為覺得佢味道比蝦米更鮮味，亦沒
有蝦米的蝦腸部份藏沙而影響口感的煩惱，但處理蝦皮工
序會多一些，但味道相比蝦米會略勝一籌^^

3)我係用磨薑汁嘅刨嚟刨蘿蔔蓉，效果唔錯呢~ 將蘿蔔刨
蓉可以令糕身更鬆軟同埋蘿蔔味會更出呢~至於蘿蔔絲，我
係用刨絲小工具嘅中型size刨絲器

4)蘿蔔糕不用加水，因為蘿蔔會出水，本身的水份已足夠．

我喺Facebook開咗專頁，方便大家留言呢~ 嗰樹唔駛寫符呢~

歡迎加入齊齊閒話家常啊~ ^0^

何師奶 ~《全職"煮"婦生活逸事 + 烹飪分享》