尋晚去咗小西灣睇東亞運足球賽香港對南韓。係未睇之前,我一直認為南韓無論出咩球員都可以大炒港隊。由於我係6點幾入場(晚上7點開始),所以仲可以睇到佢地練習,當時我認為南韓會獲勝(因為係練習時南韓的球員射門時都會射都"嘭""嘭"聲(足球撞到龍門後的廣告版的聲響),反觀港隊的射門下下炒高,包括頭槌及遠射)連坐在我附近的老球迷更認同我的猜測。
然而情況啱啱相反。當奏國歌時,我地一起揚起一面面積其大的特區旗。而開波後,港隊一直控制戰局,而我忽然轉呔,同在場的球迷一起為港隊打氣。而港隊亦收到我們的打氣,以入球來答謝支持。入球後,我地全部企身大聲觀呼。入完第一球就不斷有人話入第二球,如此類推。全場同聲同氣,港隊進攻、解圍及持球時就大聲加油以茲鼓勵,而當南韓球員犯規、進攻及持球時,我們就聯群結隊喝倒采(即請佢地飲汽水,睇開波的會明白)。最後港隊爆冷以4:1擊敗南韓。
一直以來,我都認為港隊對著南韓等亞洲列強,就算人地出二至三線都會擊敗我地的一線球員。但係尋晚港隊的表現話畀我知,此想法是絕對錯誤。就算對手係幾咁強橫,佢地都拚死一戰,務求答謝大家踴躍捧場!
從球員的拼搏以至球迷的熱情,我可以肯定,香港的足球還有希望的。只要有多幾個羅傑承的話,香港的球市肯定回復八九十年代的光輝!!大家拭目以待!!
DSCN0130.JPG
DSCN0129.JPG
DSCN0128.JPG
