糊里糊塗開咗卜！

從來無諗過自己會開個個人blog，一直都覺得呢一瓣同我呢個“電腦盲”嘅“師奶仔”無乜關係，點知身邊嘅朋友越來越多開設自己的blog，同時又鬼死咁吸引，令本來已八卦的我，更加想藉此機會了解他們的近況！因此逼不得已要自己整返個，希望藉此機會，可以重拾同各方好友的聯繫吧！！

講真，自從有咗兩個小朋友之後，除工作時間以外，所有時間也大都歸心似箭，趕返屋企同佢哋玩，對於以前曾幾何時，情同手足，如膠似漆，可以吹水吹天光的朋友們，都逐漸疏遠，有時午夜夢迴，想起故友（希望無用錯字眼）也會有無限的思念與牽掛；畢竟人年紀漸長，昔日那股熱情及半夜致電友人談心的熱忱也會隨著太多的顧慮而轉淡，一覺醒來，又忙另一天的生活，夜半的那股思念又逼於無奈回到它恬靜的角落，等候主人的下一個午夜夢迴的機會