《精神緊張, 情緒失控》

2009年03月08日

《精神緊張, 情緒失控》

星期三晚, 阿媽隻"好腳" (唔係上年做手術果隻腳) 突然好痛, 坐o係凳度又痛, 訓o係床度又痛, 隻腳點擺都係好痛......於是阿爸就同佢入o左急症室.....去到急症室食o左止痛藥都仲係好痛, 打埋止痛針都仲係痛, 等o左好耐先見到醫生, 之後又繼續等照X-ray, 最後搞到成兩點半先上病房......

第二朝 (星期四)先再有醫生睇阿媽, 佢話暫時睇X-ray未知阿媽隻"好腳"做乜會咁痛, 跟住又幫阿媽抽血驗......阿媽話食o左隻勁o既止痛藥就冇咁痛, 可以落地行o下......今日放工去探佢, 見佢精神都幾好....佢仲落地走o左去沖涼添~

(星期五) 我要返學, 去唔到探阿媽, 佢話今朝巡房果個醫生係上年幫佢做手術果個大醫生, 醫生話X-ray又睇唔到隻"好腳"o既骨骷情況嚴重o左, 或者係天氣影響同埋阿媽佢成日用隻"好腳"去"就"住隻"壞腳"o黎行路......所以就咁痛~

星期六都要返學都冇去探阿媽, 阿爸話朝早阿媽隻腳痛, 因為佢冇食止痛藥, 之後食番就好dd....

星期日 (今日) 放學番到屋企, 上o左陣facebook, (我由星期三開始已經冇上facebook喇, 因為我真係好唔開心同好擔心, 又唔想同任何人講, 所以又收埋自己唔開msn同唔上facebook......) 見到有個同事寫o左篇note係"祝你愉快"o既歌詞.....呢首歌令我諗起我哥哥.....記得當年97年1月9號哥哥離開o左我o地, 之後1月20號學校中文作文題目竟然係"一封不寄的信", 於是我就寫o左封"信"比哥哥, 講番成件事, 而篇文o既最後就節錄o左"祝你愉快"o既歌詞.....所以每次聽呢首歌, 我都會諗起哥哥......

咁睇完同事呢個note之後, 我又拎番篇作文出o黎睇, 睇完又喊, 都慣o架喇, 次次睇完我都會喊.....喊完喇, 抹埋眼淚, 準備出門口去醫院探阿媽, 點知突然間不停流眼淚, 之後成個人"mou"o左o係度大喊......我從來都未試過咁, 其實果一刻我冇特別諗d乜, 但係真係控制唔到自己不停流眼淚......我真係好唔開心呀.....或者我連續返o左兩個禮拜學, 無乜時間休息, 而且加上擔心阿媽隻腳, 再加上又睇o左同事篇note.....所有種種無形壓力加埋, 令到我精神緊張, 情緒失控......我一路喊, 仲嚇親妮妮呀, 佢好緊張咁不停"wear"我, 又嗌我 (其實我相信妮妮真係知道我唔開心o架, 因為每次我唔開心或者喊, 佢都會叫我抱佢, 佢會好緊張咁, 不停錫我o架.....).....我果一刻不停o係度講: 唔好"dum"低我一個呀......喊o左10分鐘左右, 之後我攬住妮妮坐o左陣, 抹埋面就去醫院探阿媽喇....

點知阿媽叫我暫時將妮妮搬走, 果一刻我爭d想喊呀, 點解要o係呢個時候要妮妮同我分開呀, 妮妮o係我心目中好重要o架, 有佢o係度我冇咁孤獨, 有佢o係度我唔開心可以攬住佢, 有佢o係度我喊佢會錫番我, 有佢o係度佢會扮傻樣o黎氹我開心......點解要"dum"低我一個人喎, 我真係好驚又會情緒失控呀.....不過, 為o左阿媽o既安全著想, 唯有"暫時"將妮妮搬走啦......冇o左妮妮, 我諗我唔敢亦都唔想咁早返屋企或者自己一個o係屋企.......

唔知點解無論我有幾唔開心, 我都唔會面對面同身邊o既人/朋友講, 所以身邊o既人都未必會知我有唔開心, 亦都唔係好多人見到真正唔開心o既我.......依家好d喇, 有o左msn, facebook同blog, 我有時都會o係"status"度講少少o既.....有朋友問到, 都會講o既......不過面對面就真係好少講囉~

好多謝你呢位朋友, 又再次o係我唔開心o既時候開解我.......好多謝你對我不離不棄....好多謝你不厭其煩咁提醒我......好多謝你令到我更清楚&更了解自己o既性格.......無o左你呢位朋友, 我諗我會好孤單....無o左你, 我諗我更加會亂諗o野或者諗更多o既傻o野......希望今次我唔好再令你失望喇, 我會努力~