照結構順利完成 ( 19wk3d )

尋日係老公陪同下, 3:30pm 一齊去到 Dr. Mo 診所照結構, 由於 Dr. Mo 好受歡迎好難  book, 所以我好早之前已 book 佢, 當初係用最後一日經期定既預產期 ( 23-03-2010 ) 去 book, 但原來我受孕時遲左排卵, 正確預產期延遲左 1 個星期 ( 30-03-2010 ), 結論係我尋日早左去照結構, 正常係懷孕 20wk-22wk 去照, 我尋日係 19wk3d 去照,  Dr. Mo 話盡人事啦, 只係差幾日先到 20wk , 照到幾多得幾多啦.... 那一刻覺得自己好失策, 但自己冇經驗, 心入面安慰自己唔緊要啦, 11 月中政府會同我照多次, 上網睇評語瑪麗都照得好詳盡呀.... 最終尋日好多野都照到, 好順利, 好彩~ 

Dr. Mo 真係聞名不如見面, 我強力推介佢, 好細心, 好有耐性, 好 nice, 有問必答, 又會同我傾吓有冇打算餵人奶, 餵人奶利弊…分散我訓係床緊張既心情.

開始照之前其中一則對話 -

Dr. Mo: 知道仔定女未?

我: 之前照 Oscar, 醫生話 70% 係女…

Dr. Mo: Oscar 唔準架~

我: 吓 ~~~~~~~~

Dr. Mo: 做咩, 買左好多粉紅色野?

我: 唔係… 我未買野, 我恨女呀~

Dr. Mo: 咁好啦, 我地而家去照女~

老公坐係床頭, 我地一齊睇住同一個螢光幕, Dr. Mo 開始照, 妹豬原來爬左係度, 好似叩頭咁, 佢全程成日放隻手係個頭側邊, 唔知佢做乜?!

Dr. Mo 一睇話: 女黎架~

我: 咁快睇到既, 點睇? ( 事後先覺自己白痴, 人地 1 日都唔知睇幾多大肚婆, 又唔知睇左幾多年 )

Dr. Mo: 女通常有 3 間, 你睇~ 係大小陰唇重疊住~

之後睇個腦, 心臟, 腎, 肛門, 尾龍骨, 胃, 眼, 鼻, 口, 下巴, 手趾, 腳趾… 多到唔記得… 仲睇到妹豬有泡尿未柯~ 有啲醫生一講我地一睇都睇到, 有啲講完就要加想像力先睇得明…有握拳頭, 又好合作地出爪比手趾我地睇~ 當醫生照佢個樣, 佢仲擰歪面, 醫生話佢怕醜.

Dr. Mo: 你睇隻耳仔, 好清楚, 幾大隻~

我: 吓 ~~~~~~~~

Dr. Mo: 做咩?

我: 我叫左佢唔好似老豆…

Dr. Mo: ( 望一望老公 ), 係喎, 爸爸隻耳都好大, 似都唔出奇, 不過女仔唔怕啦, 有頭髮遮住~

之前我成日同妹豬講, 佢一定要似我, 淨係個咀似佢爸爸好喇~ 佢爸爸咀細細.

全程照左 20 分鐘, 計埋見醫生差不多半個鐘, 我再問多醫生幾條無聊問題, 就走喇~ 我加左 $100 買左隻 DVD 留念, 事後老公好得戚咁話似佢大耳仔, 大耳妹, 好野~~~

之後返我亞媽屋企, Play 隻 DVD 比亞媽同惡 B 睇, 嘗試講解番醫生講既野比佢地聽, 亞媽覺得好新奇, 好得意~

好感恩, 妹豬好健康, 所有器官正常冇問題; 而我胎盤各樣都正常, 已經好滿足…

亞女, 身為一個孕婦, 係會有好多疑慮, 好多擔心. 雖然媽咪唔係成日去診所照超聲波睇你, 但每次見你我都會好開心, 知道你健健康康係媽咪個肚一日一日長大, 就算媽咪陀你陀得幾辛苦, 腰骨有幾痛, 將來生你有幾痛, 我都會刻服, 我地一齊努力呀~ 我深信你出世後, 我好快會將你老豆打入冷宮而寵幸你~