盛八 & 小室屋

最近心情處於期待放假之中，唔多想寫字，今個星期去食咗盛八同小室屋，寫少少咁啦。

今晚同mi去咗食盛八，因為想食日式燒肉，上網睇到呢度有個2人餐優惠，用匯豐卡埋單有6折，所以就去試吓。相中3格碟上嘅sauce係用嚟點唔同嘅肉類，不過3款d味都唔係好突出……

我覺得絕對係放緊長假嘅mi影響我，令到我都好期待放假，睇佢笑得幾點得戚！

asahi係我好朋友哦！食燒肉當然要叫埋佢！

前菜係野菜香芒鴨胸卷+胡麻牛舌，菜卷ok好味，所謂的胡麻牛舌無論肉同芝麻醬都唔香，好一般。

韓風牛肉刺身，份量勁細，不過因為mi唔食牛，呵呵，我一個人食就啱啱好！不過我唔明點解除咗梨之外要加青瓜呢，雖然我唔討厭青瓜，不過加埋之後，就無平時喺韓國餐廳食咁好味。

d waiter話我知要用生菜包住嚟食，係加咗越式style嘅fusion嗎？

呢大碟嘢已經就係套餐上面嘅主菜，有北海道松葉蟹腳+香草牛油帶子+A5霜降和牛+牛胸腹+鹽蔥牛舌+鹿兒島生薑黑豚+柚子胡椒雞腿肉，其實portion好細，一個人都可以食得晒！

最好味係帶子同後面嗰3截松葉蟹腳，其餘嘅嘢ok咁啦。

呢小盤有機蔬菜未免太少啩？？！！

冷稻庭烏冬，烏冬滑嘟嘟幾好味。

甜品係十勝紅豆抹茶蒟蒻，賣相幾肉酸，而且d抹茶蒟蒻係結冰的！

埋單連加一同兩杯啤酒，6折後每人$300幾，我覺得其實d嘢食其實就係值呢個價，如果要原價的話就唔值。

再加星期3晚同亞鼠去嘅小室屋。

呢間小室屋主打日式家庭料理，價錢非常平民化，我同亞鼠去食飯時已經9點幾10點，所以幾乎無人，坐得非常舒服。hehe，其實呢間餐廳最大賣點係……個老細係日藉男模葉山豪，以前拍過《下一站天后》同《新紮師妹2》，唔記得都唔緊要，去食飯啦，佢會喺舖頭ga，呢個係吸引女仔去嘅主因呀

可能我哋去到嗰陣已經太夜，好多想order嘅嘢食都賣晒，無蕃茄沙律無豆腐，結果要咗呢個和風沙律，d菜都幾新鮮，不過我麻麻哋紅椰菜，d沙律入面有好多

亞鼠嘅天婦羅烏冬，我食咗炸蝦，ok好味。

我嘅蛋包飯，d炒飯係蕃茄+洋蔥+雞肉+bacon的味道，幾好味，蛋係scramble egg唔係薄薄一片狀態，好味！

近幾個月成日死去上海嘅亞鼠，呢排留多咗喺香港，我可以做少d宅女lu。

小室屋我強烈推介比女仔去，最好係幾個女仔一齊去食飯，順便睇吓男仔，一定唔可以同男朋友去哦！