旅行前一晚都要釣番轉

20-11-2009  (農曆十月初四)  生流

今日拾好晒聽日去旅行嘅野，無所事事，都係要落主場止吓痕先得，拿拿聲攞埋Ｄ架生，買好魚餌，就向主場進發喇！

19:15落到去，己經見師傅偉喺度釣緊，同佢傾咗幾句就喺樁頭開竿，擺好個架步，就同Ｄ老友吹吓水，好快又到咗21:00，依然未有魚訊，Ｄ風吹埋黎都有Ｄ凍，過咗一陣，枝竿頭彎咗一吓，嗯！有料到，立即攞起枝筏仔，感覺到係有魚食餌，特然比佢拉咗一野，感到係大野黎，但係又唔係中喎~等咗一陣，又冇勿動靜，就收番上黎睇吓，噢！隻蝦比佢搶咗，連除喺同一位置，再落過餌，唔到一分鐘條友仔又黎偷野食喇，竿頭又係輕輕一吓一吓咁彎，特然見條魚絲走向左面，我就向反方向輕輕一帶，佢就向番右面走番過黎，但呢次嘅速度比較快，我順勢提高之竿，條魚卒之知道賴野喇！想發力過石，我有準備，點會比佢得程，一揪竿跟住連挍七八吓，己經離開危險地帶，佢再向下衝，我就比兩三呎絲佢囉，跟住輪到我發力喇，一頂幾收，唔使一分鐘就將條友仔拖上水面，只見漆黑嘅海中，銀光一閃，兩斤幾嘅大黑牛就好乖咁入咗撈箕喇！上咗水，嗱嗱聲叫老友呀海同我地影相，跟住落埋生扣。

再釣多一陣，偉哥話好凍，又冇魚訊，22:15拾埋架生，清理好釣場，一齊揸車去宵夜喇喂！

睇吓幾大餅牛屎，中咗魚個人即刻唔覺凍。

番到屋企，三公主未瞓，就同我地影番張合照先！

肥美大黑牛兩斤六。