蒂賓根-天晴, 氣溫和暖

九月十一日

黃昏從斯圖加特坐一個小時火車向南行, 黎到蒂賓根探望我個德國同學 Jan. 一落火車, Jan 同埋佢朋友 Thomas 已經係火車站等我嘞. 我同Jan 一見面, 先黎個情深既緊緊擁抱, 佢係抱到我差D抖唔到氣嗰種, 我忍唔住同佢講, 老友, 我抖唔到氣呀... 哈哈哈.

蒂賓根除左因為佢優雅既舊城而聞名外, 佢地仲係一個大學城, 德國五大學府其中之一既 Eberhard-Karls-Universitaet 就係位於呢度. 呢間大學建立於 1477 年, 歷史悠久. 而城市本身既歷史可以追溯到十一世紀.

火車站外面既一所大學活動大樓.



今次我係寄宿喺 Thomas 宿舍入面. 我同學Jan好唔話得, 佢知我去德國探佢, 佢就為我安排兩晚住宿, 托 Thomas 幫我搵左佢隔離一間吉房我住. 間房個房主去左遊埠, 所以吉左出黎. 跟住就益左我嘞. 不過個房主好明顯係一個典型粗獷型男人, 完全唔執房, D避孕袋同潤滑劑仲放到周圍都係, 可能佢成日用啦, 唔執貪就手掛 . 雖然間房係亂D, 但感覺好似一個屋企, 好 warm , 而且間房仲係獨立套房有私人洗手間, 唔使錢仲想點呀老細...

當我地從火車站去到 Thomas 宿舍門口, 疑? 我發現原來Thomas 係一個不著襪的人, 唔只不著襪, 連鞋都唔著. 無錯, 從火車站行到宿舍呢段十分鐘既路, Thomas 全程都無著鞋, 無著襪. 赤腳咁行. 當時我第一個感覺係替佢辛苦, 咁行法咪好吉腳? 之後 Jan 話比我知佢呢八年黎都係咁行, 又無乜特別受過傷. 聽完佢咁講, 唔知點解我有種衝動都想
試下好似佢咁行一日, 因為我知道若果我返到香港, 一定無咁既機會.

比個問題大家估吓吖, 唔鍾意著鞋著襪既 Thomas, 佢係一個大學生, 大家估吓佢讀乜野科目呢?

係宿舍 settle down 過後, 我地一齊煮晚餐, 又發揮我黐飲黐食既菠蘿雞本色. 之後食完晚飯坐左一陣, 我地就出去飲野, 啤啤佢都唔貴, 一杯0.5L 既啤都係2歐. 晚上既蒂賓根感覺好寧靜, 係河畔散步, 可以感受到呢個小鎮既輕鬆平靜既氣氛.

九月十二日

朝早起身一張開眼, 大家估下我第一時間做乜野? 去大小二便? 梗唔係啦, 呢D等陣先做. 我第一時間起身係望下個窗外面既天氣. 嘩嘩嘩, 個天好藍, 仲要雲都唔多舊. 好感動呀, 之前既烏雲無跟埋黎. 太陽伯伯錫晒你

早餐過後, 我地第一站黎到蒂賓根第一兇案現場. 係呢度都不知幾多菲林, 記憶體慘遭謀殺.




Neckar 河兩岸既中世紀德國建築




蒂賓根三大美男子. 左起: Thomas, Jan, 變左金髮既Swedish Hongkongese



Thomas 當日化身成為導遊, 準備好晒蒂賓根既歷史資料, 一路行一路為我介紹蒂賓根歷史古蹟. 如果有外國朋友黎香港探我, 我會唔會有咁好準備呢?


鍾意仲可以坐下船仔, 遊覽蒂賓根




有個人撐艇, 唔使自己黎, 不過艇長既打扮就差D, 個個著到好似落街買餸咁.




蒂賓根舊城既中世紀建築




於德國小鎮既橫街窄巷走著走著, 有如置身中世紀既時空之中






熱鬧既蒂賓根舊城, 遊人如鯽






蒂賓根市政廳




書局-唔知點解見到D字我覺得好有二戰時期既感覺




之後站高一點看蒂賓根, 去到佢地位於山丘上既城堡




城堡入口






從城堡高居臨下, 望向大片平原




城堡另一邊既蒂賓根城區



遊過蒂賓根舊城, 就見家長嘞. 見乜家長? 就係見啊 Jan 既家長囉. 蒂賓根唔算好大, 舊城區遊半日已經完成. 之後我地就上左 Jan 媽媽屋企坐. 去感受一下德國人既悠閒生活. Jan 媽一早已經準備好自製果 tart, 我地坐係個露台度, 望住個秋色下金黃色既森林, 涼風送爽, 傾吓講吓, 說說笑笑咁就過左一個下午, 呢個下午可以話近黎最舒暢既下午. 完來唔需要任何特別安排, 唔需要趕下場, 坐底飲杯茶,  已經可以好開心.


下午茶過後, 我地就去左外邊逛左陣, 咁啱有個社區活動, 有賣物會




有音樂表演




有外國人操刀既日本劍道. 唔知點解覺得怪怪的.



睇完表演, Jan 媽媽帶我地去超市買左d野. Jan 媽媽仲買左兩包糖比我添 .

我地之後返去宿舍就開始隊啤, 跟住我教佢地玩大話骰, 呢樣香港咁流行既玩意佢地竟然唔識, 我以為鍾意飲啤既人實會識玩添. 不過因為第二朝要坐九點鐘火車走, 我地玩到凌晨兩點幾要去就寢嘞.

九月十三日

Jan 同 Thomas 一早已經準備好早餐, 早餐係德國啤酒送大肉腸. 係, 無錯, 一早起身就飲啤, 之後又可以係火車上瞓過. 最後跟 Thomas 道過別, Jan 送我到火車站, 離別一刻, 當然唔捨得對方, 不過天下無不散之筳席, 擁抱過後, 我又要踏上我既旅程, 去到下一站斯圖加特.

呢兩年係瑞典, 最大得著唔係書本上既知識, 而係認識左唔同國藉既朋友. 電腦資訊發達既年代, 知識已無界限; 只要有部電腦係手, 可以隨時隨地接觸各樣既知識. 反而人與人既關係會被時空阻隔. 如果無黎到瑞典, 我唔會認識到呢班朋友. 對呢份友誼, 我會珍而重之.

下一站斯圖加特, 我地會去坐Benz. 對Benz 有興趣既朋友, 記住留意喇