魔鬼的口頭禪

2009-11-14 香港經濟日報: 蹺絕人寰

年輕人問我，闖蕩江湖，如何可避免遭人搵笨？中年師奶請教我，如何教阿仔，令他不會學壞？

過來人經驗，引誘你犯罪的魔鬼，經常在你耳邊說這六句話，當身邊的朋友在你身邊不斷發出這六句話，重複五次以上，毋須懷疑，它顯然是魔鬼。無論在任何場合，保持清醒，立刻離場。

魔鬼的口頭禪，第一句：「一次半次，無咁蹺嘅。」魔鬼引誘人，總是說：「試吓啦，無咁蹺嘅。」可是，當你試第一次後，就剛剛碰着啱啱，斷正。例如，飲酒後駕車，必然會遇到吹波仔。

第二句：「少少哋，唔怕喎。」魔鬼引誘年輕人吸毒，必然說：「少少哋，無事喎。」但個個就是如此便上了毒癮。

第三句：「有事，我會孭！」年輕人通常下意識知道自己從事的勾當，還會好到哪裏去？但魔鬼「義薄雲天」說：「有事，我孭！」你信他會孭嗎？一定不會，第一個篤你背脊的必然是他。

第四句：「唓，個個都係咁o架啦！」然而個個都係咁做並不表示係好事，人人去援交，你偏偏不這樣做，特立獨行，盡顯個性，潔身自愛。

第五句：「唔怕喎，無人理嘅。」魔鬼經常教唆人做壞事，未能將壞事合理化，就把它「縮細化」，以減少自己罪咎感。你要認清，過去無人理不表示無人執你手尾。

第六句：「人一世物一世，試吓喎。」人有好很多未試過的東西，例如——死。魔鬼引完你一次，一夜情不戴套，人一世物一世，中了愛滋，咁就等死。做壞事前，魔鬼未必向你說話，但你要警覺，聲音可能在你體內，它是心魔。 
 
林超榮