2009 月餅大製作

今日約咗三嫂同愛美麗一齊整月餅，今次同舊年一樣，都係整酥皮奶皇月餅，食譜用番兔兔教嗰個！

我地總共整咗百幾個呀，由下晏點幾開始整到十點半呀，終於整哂百幾個月餅，但係今次比起舊年真係差好遠，啲餅賣相麻麻地，好多都焗到爆哂，雖然我同個爐喺整蛋糕方面都算溝通得唔錯，但係喺整月餅方面，同佢真係唔夠溝通，溫度同焗法都掌握唔到，所以搞到啲餅完全唔靚，真係失禮哂，希望收到呢啲月餅嘅親朋戚友唔好介意，多多包涵 ，來年我會努力再好好研究吓！

今年嘅製成品

P.S. 啱啱睇番舊年啲資料，原來有啲步驟出錯咗，第一係奶皇嗰度，粉類應該唔加椰汁住，等牛油椰汁煮滾咗先加粉類慢搞，之後再同滾咗牛油椰汁拌勻再煮滾；第二係個酥皮，應該唔使雪都 ok；第三係原來入爐前要喺啲餅都噴水先，而唔係入咗爐再攞出黎噴！