終於成功嘅意大利奶凍（附食譜）

失敗咗三次嘅意大利奶凍，終於成功喇，好開心呀 ！

之前失敗三次可能有好多原因，可能係啲奶煮得太熱，熱到佢面有一層薄膜產生；可能唔應該連埋忌廉一齊煮，忌廉一煮就溶；可能魚膠粉份量唔啱，所以唔凝固；可能步驟錯咗，所以整唔成；仲之有好多原因所以失敗咗三次，今次決定再試另一個方法，終於成功整出滑漏奶凍！

材料：

鮮奶　　　一盒屋仔（大約係 236 毫升）

忌廉　　　250 毫升

砂糖　　　25 克

魚膠片　　8 克

 製作過程：

先用少許水浸軟魚膠片一陣，再隔熱水座溶備用；將糖倒入鮮奶一齊以慢火煮至糖完全溶解，再稍微煮熱鮮奶，熄火稍微放涼甜鮮奶，之後加入魚膠溶液攪勻直至魚膠溶液完溶解；一邊攪拌鮮奶至完全放涼，加入忌廉拌勻；倒入布甸杯，放入雪櫃雪凍 4-5 小時或過夜即成！

今次個奶凍都幾 good，甜味適中，老公都話好食，不過佢有少少嫌太多忌廉，一個食太漏喇，要兩個 share 一個，老公咁講，我諗下次可以試吓減少啲忌廉，或者減少至少 50 毫升！

滑漏漏嘅奶凍

P.S. 今日係大 Ka 生日，喺度祝佢生日快樂，身體健康，心想事成！