最美麗的第三天

終於有時間寫下Blog啦！無寫咁耐，真係好想快完成台北之旅！

第三日，終於唔知醒，到十點，無得食酒店早餐。所以我就落去便利店買早餐，圖中長方形蒜蓉包就係好好味第二位！第一位係麻辣雞！

之後去台電大廈站，因為昨晚係士林問過謝長廷助選團，問佢地件衫邊到有得買，班學生就話台電大廈站附近。我地就跟著指示去買。

去到無得買，因為係分時段，我想買果件就要等到四點先有得買，緊係唔等啦！旅行時間有限啊！

但就係附近買左一件T，都幾貴，又幾靚！

之後就有鼎泰豐，真係好多人，要係登記等位落埋單，等你一坐低就有得食。

蟹粉小籠包，最好味，皮薄餡靚，湯唔易流出黎，好有蟹味！鮮甜！

其他雲吞，擔擔麵，酸辣湯，前菜就一般，可以唔係我地香港口味，唔係咁慣。所以下次有機會一定淨食小籠包！

跟著去五份蒲，果係成衣分銷中心，比其他地方平少少，亦有好貴衫褲。無買乜野，週圍行一圈，再係街邊掃小食。

四點到，搭捷運到淡水，情人橋。搭捷運都要四十分鐘，到淡水站後，仲有搭一程巴士先到碼頭！去到已經日落啦。

我地起勢咁映，映到天黑！行情人橋，行海濱公園，食下小食，吹吹風，係情人橋做情人做野，咁……不知不覺，已經八點幾！

肚餓就返淡水老街搵食，又係掃街，我地無乜正餐，無飯落肚。不過食食食，都好飽。食左蛋糕，雞翼，草莓等等。再買下飾物，之後就去忠孝復興站買蛋糕！

依到就係阿墨蛋糕，好好味，貴貴都好多人排隊買！老喵專登黎買孝敬屋企人！

最後就返西門夜市，再掃街！！！麻辣雞，今次買夠double！仲有燒烤包，串燒，蔥抓餅等等！返酒店開餐！！！