未完的感動

平安夜，接老喵放工，拿拿臨去食飯，因為唔想咁多人。今年我無訂位，訂什麼大餐，因為太貴，之前兩年都食過，都不是我倆的口味，雖然氣氛係好好，不過老喵同我都話等聖誕完旦過後先擦餐勁。我地就去左鋸扒，都貴左，不過一年一次，人地都要出雙糧出花紅丫媽。

之後去左打遊戲機，因為老喵係公司受左少少氣，就帶老喵去發洩一下，玩左非主流遊戲，多數都係佢贏，好叻呢！等老喵放鬆同開心番後，就租碟買小食靜待我倆平安夜。

到十二點正就係我地交換禮物時候，收到包得靚靚袋仔同聖誕卡，老喵因為怕我成褲袋都係散銀鎖匙，會唔見，所以就送個袋仔俾我袋好，唔洗周圍摷。仲有老喵親手寫聖誕卡，睇完後好sweet sweet。

我就送左個MP3俾老喵，因為知道佢部舊機電池容量下降，所以就送部新啦。其實想買i pod，不過i tunes比較難用，而apple會成日出新機，音質亦不夠SAMSUNG好，介面又適合女仔，當然選擇SAMSUNG啦，仲有其他功能適合老喵用呢。而且入埋我平時聽歌入去，等佢知道我喜歡什麼歌，等我唔係佢身邊時聽到我嘈吵音樂，都記得我有幾嘈吵！哈哈！

25號，我地去左冬季購物節同美食節，勁多人！！！其實就好似平日商場推銷攤位咁。無乜特別。美食節就好，我地都買左好多食物，唔錯呢！之後就唔係咁舒服，返屋企休息休息。

雖然聖誕假期放完，但我地聖誕節目仲未完，因為我地未去尖東睇燈飾，未映夠相，未行夠海旁，未吹夠風！所以待人潮過後同燈飾未拆期間，我地會繼續感受我地聖誕。