奇妙的"動物傳心術" - P.1/2

     6月7日我學了網上相傳的"動物傳心術", 成個過程用"奇妙"的兩個字形容, 因為Feel咩都差唔多"中", 真係另我有驚有喜, 驚-怕Feel錯, 喜-原來Feel中左, 要對方 OR 動物主人話比我知答案, 才知道自己感覺很高.

     一開始老師講解基本與動物溝通的途徑, 同點樣適當地去溝通, 溝通當中會感覺到D咩野, 例如: 影像, 聲音, 朋感覺, 字等等....

     跟住老師會教點樣放鬆自己, 釋放負能量, 帶你進入冥想狀況同感覺磁場等等.

    以下是在堂上的功課, 係我當時感覺到的, 與大家分享一下:-
    **A是本人**

1) 老師要我們6位同學同一位M小姐一齊用剛剛老師教的方法放鬆與冥想, 感覺一下M小姐的能量, 老師要我們每個人講出感覺.
     A答: 一開始很平和 => 跟住開始心跳 => 心裡不安 => 心跳加速 => 我心裡想著對方有什麼不安 => 彈出影像竟然係一舊錢"係一疊紙幣" => 當時唔多肯定 => 我心裡又問:唔係感情嗎?? => 又彈出影像係一舊錢"係一疊紙幣" => 感應對方現在係無男朋友. (全中~ 這位M小姐我唔認識, 也是第一次見面, M小姐說剛才真的心跳得好快, 佢真係有"錢"的煩惱，不過當然無同我講咩事啦，我連佢現在無男朋友都感應到)
    
2) 與其中一位同學E小姐手拖手互相感應
     A答: 對方心情好平和, 感覺對方係一個開心同自由的人, 內心無壓力 => 我心裡突然想起唔知E小姐鍾意食咩野呢? 突然彈出影像, 係一舊壽司, 比正常大10倍的壽司, 我心諗"壽司, 又再彈一次, 係正常大10倍的三文魚壽司.

(半中~ E小姐話佢係一個無咩壓力的人, 因為佢唔會將唔開心的事記住, 三文魚壽司唔係佢鍾意食嘅野, 但因為佢男朋友超級鍾意食, 所以經常性會食到, 所以可能比我見到)

3) 各人抽出其他同學的動物相片, 我抽到的是"龜", 老師要我們先睇下張相入面的動物, 感覺一下有咩信息比我地, 例如要我地感覺下這隻動物係咩性格等等...唔准估, 唔准諗立即講出黎.
     A答: 一片空白, 咩都無, 跟住所有同學答完, 我舉手話有補充, 我指住張相講左一句: 佢(龜)好蠢, (其實真係唔知點解會咁講)
(又中~帶相黎的同學眼都突埋望住我講, 佢真係好蠢架, 仲連講兩次, 同學也(樹)起手指公)

4)  各人再抽多一次其他同學的動物, 今次係一隻貓.
     A答: 影像隻貓打圈不停咁跑(一秒閃左一下) => 我問佢鍾意食咩, 無反應 => 我用影像比個貓罐頭(閃左一下) => 感覺拒絕唔要 => 我再問鍾意食咩, 一樣無反應 => 我問佢鍾唔鍾意主人啊 =>   佢又比影像我, 一個中年女人企係厨房, 短曲髮身穿粉紅色衫, 黑色長褲, 穿膠拖鞋, 向右手面移動係一間睡房門口, 我見到一個帶眼鏡的男人係房入面望出黎 => 我問佢可唔可以摸下頭仔, 佢比我摸, 臨走前貓貓同我講: 我好細個, 係小朋友.
(半中 ~ 同學話貓貓是領養回來, 可能留有前主人的影像, 但唔鍾意食貓罐頭係真的, 現在比較鍾意痴佢老公多D, 佢老公又係帶眼鏡的, 貓貓同我講: 我好細個, 係小朋友, 主人話佢都已經7-8歲仲好似小朋友周屋跳無時停.)

5) 今次係一隻哥基狗, 老師要求主人寫兩個問題要我去問, 1) 鍾唔鍾意D野食. 2) 無得日日落街, 有無唔開心
     A答: 一開始我同狗狗打個招呼(其實我都唔知點解, 想打就打), 我話HELLO狗狗你好嗎?? => 我聽到一把中年女人聲不停地讚隻狗: 你好乖仔嘅(講左好多次), 真係靚仔姐(其實分唔清楚隻狗係咪鍾意聽喱個女人讚佢) => 我問佢第一個問題, 狗狗閃左個影像比我係一大舊肉煮熟左嘅肉類(因為閃得太快睇唔清係咩肉, 但一定唔係牛肉) => 第二個問題, 佢又比影像, 係一個好似走廊的地方跑一次比我睇, 跑得好快, 最後跑到我面前申條舌頭出黎, 好似好開心咁（示範跑一次比我睇） =>跟住我比影像佢摸佢個頭仔, 佢好似好鍾意，仲用條好濕的舌頭舔我隻手, 當時立即心諗: 嘩~~濕曬啦 => 我最後都同狗狗講bye bye，狗狗對住我叫左一下（係善意的叫，唔知代表同我講bye bye還是唔好走，分唔清)
(中～狗主人只回答了問的兩個問題，無錯，主人好少比乾糧同狗罐頭，通常自己整肉比狗狗食，第二答案仲神奇，主人屋企真係又個好長的地方比狗狗跑，狗狗日日來回跑好多次）

＊＊因為怕明天唔記得Ｄ細節，所以回家第一時間寫左Ｄ問題，今天已很累了，明天再講其他同學感覺我家的貓貓係點嘅。＊＊