無奈

呢幾日要開工喇﹗日日番去開會，不過開半晝啫﹗但係都已經忙到死。

因為我部notebook比家姐攞走咗，細佬o個部又冇word，而我又唔鐘意o係學校度做嘢，(因為未開始做嘢已經不停咁比人叫o黎叫去)所以去咗樓上個朋友仔度借電腦做嘢喇﹗我已經上咗去3晚，其實都有d唔好意思，所以我一定等佢o係度我先上去。點解無奈呢﹖因為而家佢同佢屋企人瞓晒覺，淨低我一個人o係度望住個爛瞓豬瞓緊，我就繼續做嘢，唉﹗好似o係自己屋企咁。周圍都好靜，好似好夜咁，其實而家只不過係11點幾咋﹗

天文台話聽日掛8號風球嘅機會會好大，我諗都係喇﹗因為颱風個移動路線不停咁變，卒之變到而家好近香港喇﹗聽日早d掛就好喇﹗咁我就唔駛番工喇﹗不過朋友仔可能要當值喎﹗辛苦晒﹗

原本計劃同屋企人呢個星期六日去離島玩一兩日，不過而家打風，都係冇得去o架喇﹗我突然間好想去長洲踩單車呀﹗

今晚睇住中國女排連輸3局比巴西，真係睇到冇眼睇，雖然金牌無望，希望可以打得贏古巴攞番個銅牌啦﹗其實我覺得今年中國攞嘅獎牌都幾意料之外，原本諗住攞硬獎牌嘅就冇得攞，但係一d冇諗過可以攞到獎牌嘅項目就攞到。

猶記得4年前睇中國女排同劉翔比賽，o個陣半夜都要捱眼瞓睇，(其實我唔係一個會因為一d世界性嘅運動比賽而捱眼瞓嘅人，我都冇運動細胞嘅﹗)我同我屋企人一齊睇，睇到V嘩鬼叫，連瞓緊覺嘅爸爸媽媽都比我o地嘈醒一齊睇，o個次係我咁大個女第一次睇d運動比賽睇到咁投入，所以今年想睇多d賽事，點知個結果……愈睇愈冇心機。

其實聽日打風留o係屋企都好悶，因為上一次又係因為打風唔駛番工，諗住好嘢，搵d姑姐o黎打麻雀，點知因為冇車而開唔成鵲局，搞到晨早起身冇嘢做，悶到我死。