創業 (16) - 筍崗之光怪陸離

實在很抱歉，我偷懶左年幾，大家係咪以為我同亞爽已經被金融海嘯吞噬左呢﹖

其實，我要同大家報告一下我們的近況﹕我們艱辛經營的製衣廠，已經在2008年頭轉贈給了朋友，冇錯，係半賣半送，走都走唔切。

而我倆，亦以已經在2007年內，以200人廠的規模，奇積地創造了800萬美金的營業額，總算對得住我眼尾果幾條皺紋，同埋比大陸人激出黎的果幾條白頭髮!!

而整整成個2008年，我地就咁 hea 下 hea 下過左，唔係講笑，真係要透足一年先至補償得翻過去幾年的勞心勞力呀!

故事講翻轉頭，由2005年頭說起。

話說我們租了筍崗區的核凸廠房，所謂「核凸」，我覺得有必要在這裡好好的描述一下，等你地知道我地當時幾咁可憐。

因為廠房隔離係一個地盤的關係，搞到我們樓下超污糟。個地下入口位置，係長期怖滿垃圾的，一大堆一大堆，好似一座座小山丘咁，係隔幾日先有人清一次。所以我們每次落車，都要掩鼻半開合眼，好似D臭氣會攻盲對眼咁，已經唔敢去諗有冇老鼠了。

廠房一共6層，我們只租用了4樓的一個二千多呎單位，廁所和走廊都是共用的。

首先要講下果架電梯，作為一架貨 lift，它是經常性壞的。衰在我們又懶，覺得行4層樓梯都唔係太野小，所以都經常性冒生命的危險，去乘搭那架電梯。你有冇見過一架電梯的內、外籠，都係生晒銹的﹖﹖電梯門在3樓是合不攏的，每次在3樓打開後，都要人手推，先至可以將門關上，電梯才可以再次開動。

然後，我們那層的女廁，個地下是爛的，屎坑更加係核凸到想死的，而且，係有咸濕佬出沒的!!

話說，2005年 Trinity 的設計助理 -- Nika 小姐來訪，商討新的大辦生產事宜。她初來到見到我們的恐怖廠房，已經「O晒嘴」。點知，當她去埋廁所後仲大鑊，回來辦公室後，便驚恐地告訴我們，她看見一個男人在偷窺她如廁，她出來後那人已經逃跑了。幸好NIKA是後生女一名，沒有大發爛渣，我們更一起大笑了一餐。後來，Nika索性全面禁水，整天死忍唔去廁所，搞到幾日後水土不服，病到入左醫院。

咁恐怖，點解仲要租呢?

我們選擇這個廠房的原因，是它比較便宜，只租十多塊一平方，而且，二千多呎這麼小的廠房實在選擇不多。