多口

小伙子下巴輕輕

牙擦擦今回碰釘

嘥心機有輸冇贏

炒魷魚還未識驚

近日有宗“陸雲亭”睇相唔衰攞嚟衰的新聞。事緣一名在馬會餐廳當兼職的男子買了一條三串七、並且三關全中、共得彩金十四萬。當賽事完畢時事主便興高采烈地到投注站排隊收錢。內心想着、今鋪仲唔乜仇都報晒？誰知在收銀期間、此君一朝得志語無倫次、無端端辦起阿叻來、大大聲爆自己是馬會職員。正當旁人皆以羨慕眼光看着他等收銀的那副德相時、櫃枱職員便暗中通知主管。當被證實其身份真的是馬會餐廳兼職“叉燒丙”之後、投注站主管便指他違反馬會顧員條例、除了拒絕發給他彩金之外、更通知有關主管炒其魷魚。聞說這位仁兄若不獲得馬會給他滿意答復的話、可能以死作出控訴。不過在下卻認為、既然馬會有這甚樣的一條例、而當事人在上工時亦簽名確認、所以點講這鋪都輸硬、即使死都只係旺死、不如“衰”完又來賭過實際得多。

講起馬會趣事、在下多年前某日跑夜馬的下午、在某位冠軍練馬家中作客時、我問他為甚麼還不返去馬場準備。他回應謂他不是打馬會工、而他當晚參賽馬匹只有一隻死火馬、所以不用太早回去準備。我還記得他前後三次提醒我千萬別投注那匹馬。當晚那匹馬是半冷門、我不理三七廿一買了一千元獨贏、結果那匹馬由頭帶到尾贏足一條街、每十元派一百廿幾元。第二天我在某酒家見到他與幾個人一起嘆早茶、於是上前罵他不夠朋友贏馬都唔益我。後來他靜靜跑到我面前問我落了多少注、我唯有從實回答。誰知他陰陰笑的對我講了一聲唔該。我登時有點糊塗、何以被我罵還要對我講唔該？後來他解釋、人家大馬主每年數以百萬計養一匹馬、當然唔希望派街坊、所以我罵他等同幫了他。他還說如果我對那位騎師不滿的話、只要每當他贏馬時就去多謝他便OK了！我問他點解會咁、他回應話如果一位常被外人多謝的騎師一定會餓馬餓到死為止。我在想、人人以為此君頭大冇腦死剩棚牙、殊不知到那只是騙人的外表、其實他是個深不可測的家伙才是。所以話、這個世界上永遠不會有人無端端發達的呢！