善解人意的拉布拉多,安息啦阿力，如果真係有輪迴，今世有冇機會再見到你呢．．．

收到個壞消息阿力上咗天堂．．．．阿力
        臨去美國前１個星期，有晚去完街返屋企，見到阿力沐緊雨，好奇怪，咁多年都未見過ｄ狗會被雨淋，有都係野狗無家可歸但自然反應一定搵地方避雨，佢企响士多門口，我仲問佢係咪痴咗响度淋雨，跟住佢就跟我返屋企，之後阿力就開始病，佢好似知道自已有ｄ野咁，抖氣好急，又唔瞓底，以前佢好鐘意側身瞓，但最後幫佢刷身嗰幾次佢都唔肯瞓底，我發覺佢真係有病，佢好多時企响門口望入屋好似有野同我講咁，我同佢講咗我會好快返，但我走之前阿力已經開始瘦，如果真係捱到我返佢咪仲苦
　　佢今世做狗相信都算快樂啦，我地從來唔會鎖佢，阿力鐘意去邊就去邊，就算幾日幾夜唔返都冇人理，其實我好擔心架，返親嚟都傷晒，次次都要我同佢醫．
        阿力呢一世都冇犯過大錯，冇咬人紀錄,最多响路中心痾屎，摷人地垃圾桶，反而全村都識佢，唔係佢乞人憎，係人都鐘意佢，個個見到佢都知佢叫阿力，如果狗都可以選村長佢一定羸．
　　以前日日返屋企會第一時間問：〈有冇見過阿力〉,唔係其他寶貝唔錫,肥婆三步不出歸門,唔駛擔心,丁丁每日會出現一次最多倆日唔見先要驚,阿力就要日日見先安心,因為佢咁靚仔好易出事,從此以後都冇得問.......