上村油站

星期二晚，學完急救之後搭64K去飛sir道件佢幫我借既半乾衫，途經執笠上村貝殼油站，心間突然間覺得可惜，雖然我唔係而家先知佢執，06年年 頭已經知道(實際佢幾時執我覺係唔知)，係呢間油站有我細個果陣既一個回憶，話說呆呆細個唔係一個乖既小朋友(大人講架咋，呆呆覺得自己好乖架)， 細個果陣比老豆打大既，係八九歲果年，爸爸有新既懲罰方法，就係罰企係道吊起雙手企成晚，最勁果次係由夜晚吊到等二日天光，老豆起身先放返我去訓覺；講下 個油站果次，當然就同吊起我有關啦，如果唔係前面講黎做咩呀？有一晚，唔記得咩事，比阿姨用同一個方法黎吊我罰企，不過佢就冇老豆吊得隻手咁高，個結仲打 得幾求其下，佢行開之後，我就解個結，走，離家出走，唔知想走去邊，總知就係要離開屋企，呢一日裡面，係有幾個巧合，朝早同飲完茶，佢比錢我 買益力多飲，仲有錢找，找果果錢佢比我，我就埋果幾蚊由長埔行出石湖塘，應該行三四個字左右啦，一路行一路驚比人捉返去，行到石湖塘果陣都唔知去 邊度，見到對面馬路有架72路小巴就上去，架車係去雷公田既，差唔多到雷公田，就係上村油站果道，人落晒車，我又跟住落車，落車之後我又唔知去邊，好 徬煌好驚唔知點好，總之就一定唔可以返屋企，因為我知道咁樣返屋企之後一定會比人打到不似人形，油站叔叔行過黎，問我咩事，我就同佢講，我記得佢同我 講，咁細個，去得邊丫？點都係要返屋企架啦，諗諗，諗起可以搵媽媽，當時爸爸和媽媽已經分開，媽媽個電話號碼係幾多號呢？以前媽媽比過個電話我既，仲 抄係張紙道，張紙我收係床下底，不過幾日之後比爸爸搵到，比佢撕爛，丟；不過果陣竟然奇蹟地記記記得個電話號碼，到而家，雖然個電話號碼已經 cut好耐，但係我而家仍然仲記個個號碼，打通個電話，搵媽媽，佢就即該係旺角飛的士去上村油接我返佢果道，等佢果陣，油站叔叔就睇住我，用我傾 計，第我冇咁慌，出到佢媽媽屋企就食晚飯，食完之後媽媽話送返我返去，我當然係唔制啦，佢話返到去唔會比人打既，返到去真係冇比人打道，不過，再過一排又 比人打，又搵媽媽，跟住出黎跟媽媽住啦。呢幾年同媽媽傾開計佢話咁果日佢剛剛係做野間廠返到屋企，果陣大部份時間佢都係廠做野，所以我之前話果日係好 多巧合。如果唔係果日又比人吊，仲要吊得唔好，我都唔會離家出走。如果唔係朝早比散紙我，我都唔知會行去邊；唔係個油站，我都唔知落車之後會做 咩；唔係咁記得一個望過幾眼電話號碼，都唔會有可能打到比媽媽；唔係咁媽媽果日返香港，即使打通個電話都搵唔到佢。好似就係整定我果日要搵到媽 媽咁。唔通.......我係真人show主角，所以比人安排好晒？