二世祖, 預告 ... 我未登出之旅遊趣事 ... !!!

噚晚返到嚟香港, 成個春袋都係氣. 唔係啲團友有問題, 亦唔係 services 唔好有投訴. 而係嗰條咭片寫明係某某旅行社嘅"戴甩他", 但又話自己係打工嘅, 接團搞手兼領隊嘅女人, 搞到成肚火. 俚個團, 係我個領隊老友好介紹, 諗住拍檔一團三車各帶一車, 另一車就由返俚個女人帶. 為咗俚團, 我就臨急臨忙推咗另一間話係搞義工嘅旅行社嘅團, 搞到人哋唔 happy, 即刻就取消哂我11月尾同12月, 1月啲團. 大大話話為咗俚個團, 我無咗成四個團. 無所謂啦! 做義工啫又唔係去搵食, 你估去到真係唔洗做呀! 得嗰雞碎咁多車馬費, 真係連叫隻雞都唔夠啦. 所以俚次喺籌備, 安排, 策劃, 指示方便, 全部梗係由俚個女人佢做啦! 我哋俚啲過期老嘢, 跟住尾做手尾就得囉. 頭一次見面, 個女人就話佢係優質團搞手專家, 個個團都要做到優質, 佢班客要求好高嗰喎, 仲係俾得起錢嗰隻添, 所以佢啲團一定住得好食得好.

 .... 第一餐 .... 第五餐 .... 五星級酒店, 吹風扇 ?!

心諗俚次無死囉, 好玩囉! 仲係去森波拉浸溫泉添, 舊年其他旅行社派團派極都未輪到, 家陣仲係優質團添, 梗開心死啦! 點知, 第二次見面攞料嗰時, 開始有啲燶味聞到喎. 心諗, 食好住好, 容乜易搞吖, 啲料點亂, 點無料到都好, 都無所謂, 我哋兩條 Top Escort, 咩場面未見過吖, 實搞掂嘅! 點知 .... 俚個優質團俾俚個女人搞到變咗遭質團, 想知佢點遭質啲客, 以及我點解咁扯火, 媽叉佢. 等等, 好很忙呀! (2009年11月16日)

********************************

今次帶完班小學生去佛山, 參觀民間藝術同埋同國內學校做交流之後. 又準備一吓下星期五, 帶團去浸溫泉嘞. 俚次帶完返嚟感覺到香港仲有精英嘅! 俚班學生大部份都好乖, 好生性. 俚啲真係要睇個人天份架, 同埋周邊環境, 父母同老師等等點去教! 俚三日大家相處, 睇見啲老師們都幾用心去教去引導佢哋架, 個個用心用力, 真係值得贊賞. 班學生又聽聽話話, 雖然有啲跳皮小小, 但係個個都好活潑可愛. 唔同啲話自己係一級學校啲老師咁, 咁驕傲, 又唔同啲放棄式學校, 交差式係咁二就算數. 希望佢哋俚班將來為港爭光啦! 相片今日 upload 咗啦! 自己有時間去睇吓啦! 而想知我哋點開心好玩, 兼夾佢哋點生性法. 留意囉喎! 應該喺年尾嗰時會寫到架啦! (2009年11月8 日)

********************************

下星期四, 唔講錢啦! 去做義工, 仲開心添啦! 今次帶班學生去佛山, 學打功夫, 兼同國內學校文化交流. 到時返嚟話你知班學生幾生性吖哪! (2009年10月30日)

 .... 佛山少年黃飛鴻武術團

***********************************

去完台灣氣都未唞順就即刻帶一團"豪客"去西安. 今次唔係帶衰神旅遊同埋話自己係星級嗰間, 係花仔嚟架. 花仔素來住嘅酒店質數好, 所以帶起上嚟, "住"肯定無問題嘅, "食"方便就要執生啦! "行"方便就睇運氣嘞! "食住行"俚啲嘢領隊永遠係無計, 幫唔到大家, 真係要睇兩邊公司點安排. 做領隊嘅 .... 雖然話就話代表公司, 係要幫客向公司反應或者要求同埋投訴, 第一日出嚟做嘢啲細路就信啫, 我哋啲老嘢, 咁有經驗. 都費事開聲教精人啦! 費事俾人話係白板仔或者戇居佬啦. 最緊要, 就係要自己識執生搞掂就得啦!

今團應該無問題啦! 我係超班兼夾咁超級嘅領隊, 唔係導遊呀! 哥仔, 唔好讚錯人啦!雖然今團無乜獎金但係好多掌聲, 算啦! 成功感認同感好過錢嘅. 起碼日後, 佢哋成班友一比較起上嚟, 實記得我俚個咁戇居, 咁勤力, 咁玩得嘅領隊啦! 係咪絕咗種呢? (2009年10月30日)

************************************

今次有機會再去台灣玩, 已經相隔咗三年幾啦! 我上次去係我 last 份工, 06 年春節旅行. 一家人有機會一齊去玩, 點解唔去呀! 我梗係唔洗錢嗰隻啦! 屋企人半費, 濕濕碎啦嗰幾萬銀啫, 豪華團嘛! 俚次雖然係帶個平價團. 但係, 啲團友都不知個個玩得好開心喎, 大家都知一份錢一份貨嘛, 同埋我交足功課嘛. 乜嘢住宿食都無投訴. 俚次帶完俚團, 嗰間社我以後都唔會再同佢帶架啦! 費事縱容佢做完嘢之後, 用盡借口左扣右扣亂咁扣, 呵刻咁扣我哋領隊啲人工. 俚團帶完返嚟, 埋單計數仲要我倒貼百幾二百銀添, 你一早開聲講清楚你情我願, 多多都無所謂. 佢咁做法唔興就假啦! 想知俚間話自己係星級旅行社嘅旅行社, 點乞兒法, 留意下啦! (2009年10月30日)

************************************

今日一早起身, 跑完步沖完涼, 嘆完茶兼食埋晝, 的起心干做埋份義工帶團報告先. 其實, 俚份報告喺噚日中午飯之前, 搞掂哂啦! 今日只不過搞吓啲相. 如果真係留返今日做就天光啦! 咪嘥哂我啲寶貴時間去玩去嘆囉. 今朝早嘆完, 有時間咯 .... 咪睇睇啲學生寫嘅 .... 軍訓團訓練後意見囉. 一睇, 車 .... 卅三份得三份係有啲啲料睇, 其他嗰啲, 唔好講啦! 真係不知所謂, 浪費心機, 浪費金錢, 浪費時間, 浪費祈望, 浪費.... 十個, 一百個浪費都講唔完吖.

俚班0靚仔, 簡稱九工仔 ... (狗公仔), 無講錯架. 俚兩日軍訓, 佢哋俾大陸教官教. 將來, 佢哋肯定俾大陸佬點, 俾大陸佬洗, 服侍啲大陸佬啦咁搞法. 真係越睇越心酸, 越睇越戥佢哋悽酸! 細路, 生性啦! 你班友唔認真讀書做事, 第二時出嚟要做牛做馬做埋狗都唔奇嗰喎!      狗公仔們, 有本事嘅, 將來叻過我就得架啦! 假假地可以喺五十歲人, 搵夠正式退休嘆世界.       想睇相先呀, 咪去我個相簿度, 識唔識搵呀, 話埋你知嘞, 警你班友懶到唔會搵添. 喺最尾2 ... 最底嗰度, 寫住 ~ 小兒科軍訓之旅. 就可以見到你哋個衰樣架嘞! 10月31日有緣嘅 .... 再見啦! (2009年10月18日)

*************************************

玩完軍訓團, 下星期二又有機會再去台灣玩吓. 記得上次06年, 我最後嗰份工, 間公司搞春節遊一家人一齊去玩過. 家陣一條友再去, 肯定過癮死啦! 台灣, 好講唔好聽都係嗰句, 後生如果唔生性, 都應該有個仔廿幾歲囉! 至於台灣熟唔熟路, 真係唔熟, 因為我以前去親, 都有私家車坐有司機開車, 洗鬼睇路咩, 洗鬼洗錢咩. 隔咗咁耐, 今次有係咁, 唔洗睇路唔洗洗錢, 真係低鬼死嘞! 咁好命嘅你 ! (2009年10月17日)

 .... 06年春節台灣九份*************************************

去完12星酒店美食之旅之後, 真係名不虛傳喎, 簡直虛傳到天上有地下無嗰隻. 好彩, 我哋班友個個無計較, 越玩越開心, 玩到盡先至散 band.

嚟緊禮拜五六, 又有機會去做吓義工, 帶班學生哥上大陸軍訓兩 days, 兼可以睇真槍實彈嘅特種部隊表演添. 到時係老友囉, 咪嚟睇睇捧吓場囉. (2009年10月13日)

********************************

俚個禮拜星期六日, 自己俾錢同條女去旅行玩吓! 去肇慶住 12 星級酒店. 多得個 blog 友 ~ 呀表哥好介紹囉! 放咗好多靚相上綱, 同埋都聽其他朋友講過, 值得去玩嘅. 俚次去玩嘅係包團, 全部自己街坊朋友, 兩日要成千銀架, 正一食好住好. 錢搵嚟洗又唔係搵嚟睇, 有咁嘅質素, 我梗去啦! 唔似得班富貴咁, 參加埋啲三四百蚊嘅團, 已經嘩嘩聲話係豪華團, 要求多多. 那, 俚次旅行, 如果個導遊領隊唔掂, 我會馬上頂上, 廢事俾佢兩條木咀, 搞寸個 party 另所有人唔開心添噃. 俚啲咪叫自己識得享受旅行開心囉. 去玩嗰個係我哋嘛, 唔係佢嘛.

講返9月25號睇醫生先. 今日連我農曆生日都過埋, 可以亂翕都得嘛. 咁迷信架你. 其實唔係呀! 係借口俾自己偷懶啫. 睇醫生俚回事, 其實都係好早都要睇架啦. 以前因為工作忙, 又係借口. 應酬多, 都係借口, 自己百足咁多爪, 好玩好飲又好食. 拾幾廿年前明知個老竇未死都分咗啲遺產俾我哋幾兄弟 ..........  咿! 到此為止. 我搞錯地方添. 俚度係講旅行啲嘢, 唔係講自已啲衰嘢嗰喎. 想知道我啲衰嘢呀! 自己去搵吓啦! (2009年10月8日) 

*********************************

今日好興, 唔講唔得. 有條狗公議員搞個助理, 玩性騷擾衰咗, 真係能死啦. 我一早就話啲知書識禮, 假道學嘅人喺社會上唔少架啦. 俚條威哥啱啱水鬼升城皇, 仲唔去風流快活咩. 去滾就滾啦, 叫雞咪好囉, 玩騷擾咁笨實, 橫掂都衰收尾架啦! 係我姦Q咗佢啦! 至於俚條女助理又係幫唔過嘅, 平時梗係姣屎戥督, 咪俾人以為佢發姣囉! 仲唔乘機上咩. 如果唔係, 仲衰, 俾條麻甩咸濕得一次, 再嚟第二次, 唔去告佢都要同佢老婆單聲嘛, 乜嘢都唔準備吓咁笨, 真係唔俾人姦咗, 好彩啦. 至於俚件事我點解咁興, 因為我細佬又係咁, 衰咗玩女人. 條姣婆仲係佢老婆介紹添! .....  請進入 .... 盡情發洩 ~ 繼續欣賞閱讀啦! 不過係自己友先可以睇到架咋. (2009年10月6日) 

********************************

下晝去咗醫院覆診, 無乜事, 有心啦! 咪又係嗰啲世紀絕症嚟之嘛. 上星期抽咗血, 今日應該有報告啦! 去到醫院, 正常驗血糖, check 血壓, 點知捉埋去做心電圖 .... 吾唔, 唔通 .... 有事?  等咗一粒鐘終於見到醫生 .... 佢話 (2009年9月25日)    註 : 唔好意思, 過咗我生日先再繼續寫吓.

********************************

25號星期二啱啱落機喺三亞返嚟, 諗住又可以唞返兩日啦! 屋企都未返到, 公司就 call 我, 要我帶一個兩天團, 去東莞三正半山酒店玩兩日, 話咗俚間酒店廿幾年嚟我住慣住熟架啦! 咁正嘅酒店, 去得過吖. 收到料一睇, 仲係唔洗去華僑城嗰隻添, 正. 噚日四點幾就過咗關返嚟香港, 估吓俚兩日行程係點, 唔洗講嘞! 如果話辛苦嗰啲, 仲要花錢, 不如留返喺屋企, 開烈冷氣, 食你個鮑參翅肚好過啦! 不過, 好似好多人屋企, 無咁大間房喎, 又無泳池, 又無夜總會, 又無西餐廳, 又無酒樓, 又無司機, 又無賓佬洗添. 不過, 講嗰啲話自己係富貴啫. 所以, 我真係無咁笨呀, 有齊咁多嘢嘅旅行, 點辛苦都去啦.

俚次出團, 諗住做義工啦, 將嗰啲雞雜咁多嘅人工, (咪能再叫小費啦! 大部份都係貼能反哂落團費度架嘞.) 港紙三嚿水捐俾台灣88雨災做善事啦, 仲想, 啲團友支持吓啦. 我做足功夫, 加多兩錢肉緊, 落力做好領隊嘅職責架啦, 想搏有多啲打嘗, 咪會有多啲捐款囖. 仲話哂俾所有人知架啦, 同埋買埋手信, 人人有份, 先送禮物, 翕哂多謝捐錢架啦. 點不知, 到頭來賠了夫人又拆冰, 最後連人工加埋打嘗得番一嚿水多啲啲做善事, 真係得啖笑. 無支持嗰啲, 唔洗我指名道姓啦! 投訴又多, 又無供獻不特止, 連拾零銀嘢嘅禮物, 都開埋口要攞. 仲要左簡右簡. 俚團真係富貴多多, 佢哋真係人在天堂, 錢在銀行囉.  (2009年8月28日)

*****************************************

今次再去三亞海凱斯基渡假酒店, 舊地從遊, 帶住拾隻, 最唔好彩嘅就係, 嗰條麻甩亞黃, 同佢老婆, 帶咗個14歲嘅仔去玩, 唔一齊同房瞓, 寧願晚晚由地下嗰層, 走上七樓同我同房瞓, 真係戇居, 梗係慌死蝕底啦! 唔通, 佢同佢老婆, 有啲問題. 其實, 咁好嘅環境同老婆溫馨吓唔去做, 咁好嘅親子關係時間嘥錬哂. 除非 .... 條友, 唔估啦!      好似上次去西安, 嗰條咸濕死肥佬都係咁啦!           我就, 話知你, 自己做自己嘢, 晚晚十一, 二點先瞓, 朝朝早, 晨咁早, 五六點就起身. 等你知道吓, 做一個負責任嘅領隊 .... 點辛苦啦! 

不過, 我不知幾鬼 enjoy 俚度嘅陽光海灘, 同埋泳池暢泳嘅閑暇生活 .... 仲有吖! 得閒行吓街, 食吓正嘅. 我自己都洗咗唔少添啦. 唔似得另一條麻甩叫豆皮杜嘅富貴, 帶住個仔同埋個唔識笑嘅木面黑咀老婆嚟玩, 佢喺俚個旅程嘅意見書上面, 寫咗好搞笑嘅幾句說話, 就係 : 享受並不等於花錢, 其實可以推介一下當地市民好吃的菜館, 同埋購物點安排, 話 .... 沒有驚喜, 喎!

 ... 俚餐, 一百銀有找.

享受並不等於花錢 .... 俚句話, 我就得啫, 你點得呀. 唔俾錢想嚟嘆, 你咪諗啦! 傻佬. 我食一餐好啲咋, 都成百幾銀啦! 享受並不等於花錢, 等到七月十四啦! 都要你一早去排隊, 先至可以得嗰幾粒瘦米咋, 想有免費午餐, 返去你老母屋企啦. 至於, 佢話可以推介一下當地市民好吃的菜館. 其實當地市民, 平日生活, 咸豆都無粒咁過活, 邊處學得你啲咁嘅富貴, 上茶樓酒館一擲千金吖. 點學得你班友, 寧願嘥成嚿水打的, 出去食幾拾銀嘅麥記, 肯記吖! 講到購物點安排無驚喜 .... 挑! 你有本事就去買Q咗嗰條一百廿五萬嘅珍珠錬吖, 咪有驚喜囉 ! 我同導遊, 更加驚喜添! .... 戇居佬. (2009年8月25日)

***************************************

諗住星期四嗰日早機返到香港, 晚黑同老婆去跳吓舞, 去學咋, 然後撐吓枱腳. 星期五就約好呀郭醫生個老友, 周一嶽個呀嫂, 同埋勞力士, 伯爵錶香港總代理商個女婿, 夾埋會計司總工會主席個老婆, 一早飲早茶, 然後去佢哋西貢間豪宅打台灣牌, 晚黑就去尖東佢哋間飯堂食飯. 點知一落機, 公司就即刻 call 我, 要我返去攞料, 話聽日要我帶一個三日團, 去華僑城加長隆. 無法啦! 鬼叫俚牌做咗紅牌呀姑咩. 真係無獨有偶, 雖然我俚牌真係玩到人都癲. 但係, 俚團個個團友, 大人兼細路, 都玩得幾鬼開心呀, 仲見識到國內啲經典嘢! 你咪話唔物超所值呀 ! 淨係一個(4D)電影咋, 哈哈哈, 真係全世界, 只係華僑城先至有咋.

你睇吓俚兩個0靚仔, 一個叫嘈B, 一個叫志雄, 熟到 .... 妹妹都話無眼睇囉.

全團嘅中心人物, 就係我哋導遊華仔哥嘞, 無佢咁賣命喺幕前嘅演出, 俚場三日 talk show 戲, 點會搞得咁好吖. 至於我呢, 唔好講啦! 瞓飽就食, 食飽就痾, 痾完就瞓. 食呀, 住呀, 玩呀, 仲好過哂啲團友添, 最低死嘅就係, 個個都有打賞俾我喎, 連華哥仔都自動自覺咁, 整成嚿水我飲茶添. 你話嘞, 係唔係最 happy 嗰個, 係我呢! 我去玩之嘛, 真係要多謝哂俚班老闆兼闊太囉. (2009年8月18日)

                                 按此可到我的旅遊目錄

欲知以上旅程發生 d 也嘢 .... 請留意登錄啦 !

.... Good Day !