升斗市民vs星匯居

靚媽呢期少咗出扑，因為我返咗份新工。

新工作係秘書小姐，其實係大打雜。

買飯比老細呀，速遞員呀，跟班呀，跟車呀，打掃，打字，打發sales，打曱甴，打烊咩都要做。

唔緊要，老細大把錢，又駛得起，咁我份糧出得足，又準，ok架啦。

話說有日要趕住拎嘢去個客度，嗱嗱林打的飛過去。

一上的士：星匯居吖～

的士司機（冷冷地）：星匯居？聽都未聽過。

我（冷冷地）：咁又係呀，升斗市民邊會住星匯居吖。長沙灣你識唔識呀？

的士司機（冷冷地）：我識。

我：咁蔬菜統營署呢？

的士司機（冷冷地）：唔識。

我：咁哥爾夫球場呢？

的士司機（冷冷地）：唔識。

我（火都黎）：唔識去就問台啦～我趕時間呀！！！！！

即日上映：冷靜與熱情之間變節版－－冷酷與火爆之間

結果係－－＞

司機大哥問完一輪後，車咗我去長沙灣海皮囉。（夜麻麻幾驚佢掉咗我落海）

呢個故事教訓大家，繼唔好得罪食肆亞哥亞姐（加料），的士大佬都唔好得罪。