2件新玩具（靚媽教化妝）上集

買咗2盒kate eye palettes（只售$101，抵到爆啦，買來學化妝都抵）

因為有個老友結婚，想同佢化smoky eye，所以買咗呢２盒。

講解下點玩先：

銀灰４色，珠光質地少量閃，透明感重，新手要小心上粉，幾跌粉下。

先上base，粉底，黃色遮瑕（遮黑眼圈），記住眼肚位落多少少碎粉，做smoky eye用深色多，跌粉好易整花個妝，碎粉可以頂住，到時用扇掃掃走ｄ眼影就架得啦～但記住要補返碎粉喎，唔係再畫眼影時跌粉又係整返花架咋。

用eye base可以減少跌粉，同埋令眼妝更持久＆出色。

開始用盒palette啦，記住少少咁落色，由眼線向眉毛（紅色箭咀方向）向上blend開，由濃至淡咁～

用呢隻色要跟住紅色框咁，去到眼尾向上blend，對眼就有向上的感覺，咁下眼線做後面三份一，可以令對眼更大更深邃啦～（要視乎個別眼型決定畫法）

好啦，畫眼線，用手指拉拉眉骨，打開眼皮，記住畫埋內眼線喎，唔好偷懶～

我今日係用gel eyeliner，貪其唔易甩色，易畫，想幾粗都得，哈哈～

我眼頭眼尾都好垂，畫返粗佢，成對眼型改善咗。記住家陣唔興眼尾嗰筆凌空勾上去架啦，要根據本身眼線填實佢，留意我畫個形狀，呢個係關鍵，注意！

跟住用３號色質返實條眼線，再blend鬆，咁就會自然ｄ，記住畫埋下眼線三份一呀～

跟住用白色畫埋下眼線，一定要幼同實在。眼頭位置要留意blend鬆，唔係好核突，一pat眼屎咁架。

合埋眼係咁，留意要有做到有層次感，注意blending。

對眼咁黑，條眉梗要輕手啦，咪同我畫條王小虎或者小新眉呀～要幼，要淺色，好soft咁。將注意力放返喺對眼度。

搽埋睫毛液。搞掂～（整對假眼睫毛仲正）再來多幾個角度睇真ｄ：

眼窩漸變係咁的

對比一下啦，對眼大咗成個碼，又無咁dup，成個精神晒：

(注意：呢個係未畫眉同搽睫毛液）

做呢個妝都係20分鐘左右，視乎你係咪成日化妝兼係咪熟手。練多幾次就得架啦～

注意小心落筆，唔好畫到２隻眼唔對稱（如：高低眼，大細眼），因為用深色好易睇得出你畫錯咗；反之有眼型問題既，就好易透過呢種畫法改善架。

唔爭在畫埋全妝比大家鑑賞下（橙粉紅胭脂＋珠光淡粉紅lip gloss)

加多個柔鏡，成個後生晒～（囧）

嘩～～～靚女黎啦～～～

嘔完未呀？？？

跟住第二份玩具，請留意下一集啦～

節目預告：

想睇埋金色點做？過２日來睇過囉～

喂～睇完記得留言呀，咪食霸王餐呀，唔係無下集出架！！

（明明見到幾百個瀏覽架嘛，點會無回應？？）