網誌分類：Jo Jo & BB |
噚日俾jojo飲咗幾次愛獅瑪嘅胰臟平衡液，jojo精神咗、飲少咗水、肯食滾水煮雞肉，眼仔好咗好多，同埋肯玩玩具，好似以前一樣。
但係今日再餵佢飲平衡液，飲咗一陣，轉頭就嘔番少少之前食過嘅嘢出嚟，今晚重冇胃口食雞肉。
我真係好擔心，唔知係咪真係要去開始打胰島素。我唔係怕日日要幫佢打針麻煩，只係怕日日打針，會嚇驚jojo，令佢抵抗力變弱，引致身體其他器官都有壞影響。
Jojo似乎唔係好消化得晒佢食過嘅嘢，一飲太多水，就會嘔。嘔完佢又冇胃口食嘢，唔食嘢，佢又會冇體力。
我怕唔去開始打胰島素，jojo病情可能會突然惡化(如果真係咁，至少佢都係喺冇咁痛苦嘅情況下離開)。現階段jojo仍然行得、走得(一出街，外人根本睇唔出有糖尿病)。但係打胰島素後，雖然可以控制血糖，不過我唔知壞影响有幾大，亦有機會延長jojo受苦嘅時間。
我真係唔知點做好
紅紅 2009-05-14 22:59
妹子 2009-05-14 10:57
佢今日情況又差咗，冇胃口食嘢，飲啖水都嘔。我已經打咗去Vet度，問佢依家jojo咁嘅情況，駛唔駛即刻去診所。依家等緊Vet回覆。
我同老公商量過，决定都係俾jojo打胰島素。當然我會問清楚Vet，到底副作用會有幾大。因為一開始打，就要打一世，中途唔可以停。