終於識爬啦

昨天帶咗囡囡返公公婆婆屋企食飯，我哋比較少返婆婆屋企，囡囡可能開始認人認地方，之前返親去都喊架，今次好叻叻無喊到。

公公收工返到嚟，見到囡囡坐係床道，好似想仆想仆咁，就同我講 "死火囉，咁耐都未坐得穩 "，之後公公就走咗落街嘞。咁我見仲未食得飯，就抱咗囡囡入房到玩，玩玩下見佢反轉咗身，以為佢又好似條蟲仔咁爬下，點知.. .. .. 佢隻腳仔好用力咁"拮"起，一下一下咁爬，我即刻叫我老公入嚟，我哋都好開心，我親眼見到我個囡囡寶貴嘅第一次啦。

公公落完街返到嚟，我即刻同公公示威，" 你一話佢連坐都坐唔穩，佢就即刻坐都唔坐爬俾你睇吖 " !!!

之前因為見唔到佢嘅第一次反身好唔開心，覺得自己唔能夠睇到佢每件事嘅第一次，好似 MISS 咗好多嘢咁，但一諗到我要俾最好嘅嘢佢，唯有接受現實，努力工作。

心悅，你係媽媽嘅心肝寶貝。