觀課

星期三, 媽咪到阿B學校睇佢上堂. 以前, 媽咪成日比人睇上堂, 今次可以睇番人地, 感覺截然不同.

話說媽咪早咗十分鐘去到, 走入等候o既課室, 家長只有小貓三四隻. 咁少人想睇自己仔女上堂? 唔係, 因為學校將全班(40人)家長分成五組, 而我係睇最後一節.

無幾耐, 家長陸續到來. 職員同我地點名同派問卷後, 就有一個老師入來, 同我地講吓今日o既流程, 然後又同我地講教導小朋友o既一d方法. 跟住再講吓課室裡面o既情況. 其實呢d野舊年都講過, 小朋友學習最緊要係集中, 係屋企做功課, 千祈唔好叫佢係個房做功課, 你就係出面睇電視; 係學校上堂盡量唔好比d好玩o既文具佢地, 例如有機關o既筆盒或有d公仔吊住o既筆. 係人都知專心學習對小朋友好重要, 不過知而行難, 媽咪就成日犯咗一D唔應該犯o既錯誤. 例如當阿B做緊一樣野o既時候, 媽咪已經諗定第二樣野叫佢做, 結果搞到佢好混亂. 後來我發現小朋友接收訊息同我地唔同, 我地可以同時諗緊幾樣野, 但係小朋友就要慢慢接收. 當然, 我地亦要比佢地清晰o既指引, 要訂好規則.佢地咁細個, 簡單o既規則已可以, 太複雜佢地反而唔明.

老師講咗大約十分鐘, 前奏之後好快就進入戲肉啦. 係時候到我地進入課室. 我地睇呢一堂啱啱係小息後, 佢地係課室小完息, 有d混亂. 阿B見到我勁興奮. 我走到阿B個位後面睇佢上堂. 媽咪真係好耐無教書, 見到課室咁多學生, 有D技癢. 不過今日我係家長, 唔好傻啦. 阿B果班成40人, 係精英班, D同學應該好醒. 老師先同佢地唱首歌, 但係點解有d學生好似唔多知道做咩. 跟住老師開動o既螢光幕才顯示歌詞, 點解唔開咗先唱呢? 上咗一陣, 有d同學開始蠢蠢欲動(包括阿B). 可能係因為老師無用咪, 又細聲, 後面o既學生都唔係好聽到. 突然, 有個同學舉手告訴老師, 佢旁邊o既男同學喊, 吓?點解無端咁感觸o既? 呢個男仔, 咪阿B幼稚園o既同學, 阿B果時仲話要嫁比佢, 原來佢咁脆弱架?跟住阿B隔離個同學係度係咁搣手指, 結果搞到流血, 咁細個就自殘身體, 唔係嘛? 

雖然佢地有d同學唔係好集中, 但老師還是要繼續講課o既. 今堂佢地上o既係英文堂, 老師係唱完歌後, 便教佢地一d關於早上活動o既phrase, 然後安排佢地做一d活動. 呢d流程都係一個模式, 有人來睇上堂緊係要做一齣大龍鳳, 平時係咪咁真係要問吓阿B. 不過, 唔知係咪媽咪英文唔好, 佢地教食早餐o既英文竟然係"eat breakfast"???點解唔係"have breakfast"???以為係老師錯, 但係佢地本課本都係咁寫, 真係有無搞錯呀? 我點都會教阿B正確o既講法.

40分鐘o既課堂話咁快就完, 係咪可以多d了解阿B係學校o既情形? 真係好難答, 因為我的到來, 阿B經常向後望, 我想這是她最不集中精神的一堂.其實, 我都想比番d feedback老師, 但觀完課後, 人人都好快交到問卷, 唯獨我仲未填, 職員哥哥又係度等, 我唯有匆匆填完便走人.