吐苦水

前幾日, 媽咪番阿B學校做家長義工, 見到幾個家長在吐苦水.

家長A: 下星期就測考週啦, 真係頭痕, 都唔知點溫.

家長B: 係囉, 今個禮拜仲特別多測驗默書, 佢番到屋企做完功課, 溫咗第二日果D, 仲邊有時間溫下個禮拜D書.

家長C: 最弊佢地仲要慢吞吞,食雲吞. 真係"皇帝唔急太監急".

家長A: 我個女仲要好多生字都唔識, 上次英文測驗佢就唔知D題目問咩, 結果閱讀理解全軍覆沒. 唉, 我同佢地(佢有兩個仔女)講, 我地細個果時, 讀書唔係好似你地咁, 要媽咪擔心. 果時我地做完功課就可以玩, 唔識功課就算, 因為都無人理你.

(天生天養~~~)

家長B: 不過依家做阿媽又點可以唔理佢地, 唔係第二時點搵到份好工.

家長C: 好似我個仔咁, 佢細個最鍾意做消防員, 但係自從睇咗<<烈火雄心>>之後, 就話做消防員好辛苦, 都係唔做消防啦.

家長B: 你都好D, 我個仔話第二時搵唔到野做, 不如做乞丐.

(眾家長一陣爆笑, 係咪做乞丐可以唔洗郁有錢收?)

家長A: 做咩都唔緊要, 最緊要養到家, 我同佢地講話你地大個要搵錢番來比屋企, 所以依家要比心機讀書.

家長C: 係囉, 唔通我地依家咁辛苦養大佢, 第二時仲要養埋佢D老婆仔女咩.

家長B: 你又唔好話, 依家真係有好多人大個咗唔結婚, 黐住屋企......

***********************************************************************

媽咪好鍾意聽d家長吹水, 因為好多得意野聽. 呢一代o既家長, 由bb出世之後就開始擔心, 食咩奶粉, 上咩playgroup/幼稚園/小學, 小學開始就想他們的將來, 讀咩大學, 甚至, 幻想佢地成家立業. 不過, 我地是否太過擔心. 越擔心, 就越心急, 越心急, 壓力就越大, 壓力往往不只你一個人承受, 小孩同樣感到, 可能會越做唔好, 會感到窒息. 而且, 成日只想子女的事, 咁樣會好容易無咗自己, 對雙方不是好事. 所以, 有時要停一停, 想想是否要讓自己和子女放鬆一下. 係休息o既時候, 檢討依家對佢地o既方法是否有效, 休息充足, 再去衝刺, 可能會更好.

呢排好多學校都係測考週, 好多阿媽臉色都唔多好. 希望佢地會識得放鬆一下啦!