長洲三日遊

阿B自係表姐家經過三日兩夜之旅番屋企之後, 都未夠24小時, 又要去另一個三日兩夜之旅.  就係番長洲婆婆家, 游下水, 食下野. 因為爹地有成個禮拜大假, 我地又唔想外遊(因為有豬流感), 所以最經濟又健康o既地方, 就係去婆婆度, 可以陪下阿媽, 查查又可以同我地一齊, 真係一舉幾得.

睇下查查知道有得去街, 超興奮! 我地仲幫佢帶o左條好靚o既頸帶, 有厘士架. 不過, 呢隻頑皮狗竟然第一晚就將條帶咬爛, 激死人.

第二位興奮o既當然係阿B, 嘩! 件衫同佢一樣咁恐怖呀!

每次去長洲, 我地都會幫襯呢間酒家, 貪佢咩都有得食, 小菜,點心,海鮮, 價錢亦好經濟, 呢間野叫"香雪海", 個名好有詩意. 呢碗係我既至愛--蠔仔粥.

我地好少係長洲叫海鮮, 因為佢點都平唔過香港D酒樓, 不過今次我地都叫左一碟炒蜆, 好野味架.

第二日, 我地同婆婆飲茶, 經我大家姐介紹, 食o左呢度出名o既酥皮蛋撻同蜜糖餐包. 個蛋撻d酥皮係三層架, 食一個已經好飽. 呢間茶樓係本地阿公阿婆最鍾意去o既"漢軒".

食飽飽, 係時候去下海灘啦, 不過呢朝勁曬, 我地無游水, 係沙灘度執下石頭. 要游水一定要過左5點先可以去, 否則變燒豬.

我地只係沙灘逗留左一陣, 頭上已經出煙. 所以去左麥當當食雪糕, 好美味呀!

番到屋企, 阿B話要歎番陣, 睇下佢同查查同一個睡姿, 邊個搞笑D?

三日兩夜, 好快就過完, 回程時, 阿B仍然充滿精力, 仲可以睇書. 咦? 點解馬騮仔都會睇書o既?