昕昕滿月

10月14日

暫下眼, 今日昕昕就一個月大喇! 婆婆整左紅雞蛋同送左隻金厄仔俾昕昕!

呢段期間, 特別要多謝婆婆, 對我同昕昕照顧周到!

有日我問婆婆, "就黎滿月喇, 我地番左屋企, 你會唔會好掛住昕昕架?"

婆婆:"我掛住果個係你呀!(暘媽), 你係我個女, 緊係掛住你多過孫女啦!"

當時我真係無諗過婆婆會咁答, 令我好感動流涕! 第日我都唔知會唔會咁對我D仔女, HE HE.

講番昕昕, 佢真係一個小暴風女郎----小爵, 開頭果幾日, 都覺得佢, 斯斯文文, 喊得唔大聲.....ETC, 都OK,  點知, 到第三個星期開始, 手脚不停, 身周郁, 有時仲會郁到側左半個身, 一有唔滿意, 就會大聲喊, 多多聲氣! 食日不斷食, 食完人奶, 食奶粉, 有時都好似唔夠, 個咀成日可以唔停. 最激氣係, 有好幾次, 食完人奶之後, 掃風掃極都唔得, 吐番D出黎, 奶粉都會吐, 但唔會好似人奶嘔咁多囉, 唔通D人奶有問題, 哈哈!

昕昕而家平均3-4個鐘食3.5安奶粉, 中間會間住飲人奶.

上星期二(10月6日), 去健康院檢查, 黃疸未退晒, 但指數唔高, 要明天再番去檢查先知退晒未, 重量就只得7.3磅, 比出世時, 只係重得0.5磅, 但同最輕時比, 就重左1磅, 醫生話都OK的! 同暘暘比, 昕昕就無重得咁快, 婆婆就話, 係咪隻奶粉食唔飽, 食唔肥人呀??????

不過, 唔緊要啦, 最緊要健康! 明天再去健康院, 就知最新進展喇!

活躍一面