毅行者義工

今年有機會參加毅行者義工，這是我第一次做義工，好開心，所以想跟大家分享一下！

有一日無意間看到公司的通告，想要找100個樂施毅行者義工負責終點站。記得幾年前有朋友參加毅行者，我有份做支援，去到check point煮野比朋友食同埋帶一D用品比佢地，當時見到休息站有好多人躺著，有些人的腳損晒，又有些攰到唔想郁，睇見佢地都已知好辛苦．．．既然今年又機會做義工，所以我就報名參加啦！

本來我報左全程參與，但第一天我的頭好痛，所以要在家好好的休息，直至第二天上午才到大棠，好彩沒有再頭痛！原本安排我周圍走的，但同事們怕我再頭痛，所以安排我在終點站工作，參加者到達終點站時我就用barcode機幫他們嘟手帶，他們四人一同伸手出來，要盡快幫他們嘟好，因為是計第4個時間的，所以搞到我都好緊張！見到到佢地4人1條心咁一同到終點, 實在可喜可賀！

完成100km的參加者都帶著開心興奮的心情來到，其間都有好多開心事：

有一家四口一同參加，一齊過終點好團結；

有妻子手抱著只兩個月大的龍鳳胎上山迎接丈夫；

有兩夫婦一齊行，回來時說了一句：一齊行真係風雨同路，之後相擁，我都覺得好感動；

有支持隊伍見參賽隊伍歸來喜極而泣 (多數係日本人)；

有參賽者倦極煩躁而大鬧，且掉下隊友自己先行，說他們一定來不到，後來在不足一小時其他兩名隊友都到達；

又有些隊友支持不住中途退出，得番一個人能行畢全程，毅力和意志力都好緊要！

有參加者來到終點站大大聲話唔見左兩樣野：1:左腳 2:右腳，哈哈哈.....仲識得講笑！

還有參賽者甜蜜的求婚分段，相信他們都會好難忘!

雖然我無份行, 但睇到咁多參加者都咁落力, 我都替他們緊張!

本來我打醒12分精神等我個朋友來終點站，點知到天光時好凍，咁我就去拎熱野飲，可能佢地就係呢個時候到，佢又無開電話，佢又以為我無做通宵，所以我地緣慳一面，真係有D唔開心，唔可以一齊影相，因為實在好難得！不過唔緊要，或者佢出年再參加，我又可以為他們打氣！

做咗差唔多30小時，我都倦透了，返到屋企都訓番夠本，哈哈哈....希望下次有機會再參加過，做義工或者參加支援隊都好啦！

參加者見到呢個牌就係到達終點，唔怪之得我哋見到個個都係衝落來啦！