齋@青松觀

昨日同屋企人一早去青松觀&妙法寺拜神，之前都喺妙法寺食過幾次齋，講開好耐都無試過青松觀嗰D啦，所以今次試吓好唔好食啦，假日只係得套餐，無得散叫，所以我哋點了一個5人餐，好快就有得食 ~

五柳素鮮斑 - 呢個最好食，用芋頭蓉做成魚狀再炸，加埋甜酸汁，必食之選

發財紅燒金菰翅 - D火腿絲都好似架

如意小拼盆 - 上面果D脆卜卜，好鬆化，素雞都好好味

金牌老鹵豬肉 - 賣相很似，口感都ok，如果真係肥豬肉我一定唔食，但呢個我食咗好多件呀！

北菇花膠扒西蘭花 - D花膠都幾爽呀！

紫蘿生根球 - 齋生炒排骨，材料是生根 + 菠蘿 + 青椒，酸酸地好好味

青松頂上素 - 好重南乳味，冬菇好厚肉！

巧手茄汁燴意粉 - 有好彈口的肉粒，加埋濃郁的茄汁，幾飽都要試少少！

總括來講好食過妙法寺，好大碟，唔會太油，亦多人好多，當然價錢都係貴一倍啦，在妙法寺每人75蚊，但只得4個餸，青松觀就有8個餸，大家都食到好飽呀！