結婚一週年紀念DAY 1A@南丫島

結婚一週年紀念DAY 1A@南丫島

我哋嘅結婚大日子係08.08.08，即係京奧開幕日，所以早幾個月我同Darling就已經過左我哋嘅紙婚紀念嚕。因為無幾耐前去完渡蜜月，Darling又忙，所以就無大搞，決定只係用一個周末簡單地慶祝就算喇。

Darling知道我一直都好想去南丫島食海鮮，於是就靜靜雞搵左間酒店，打算同我去試下兼且睇下風景燒下野食響果度過埋夜。佢本來想俾意外驚喜我，但又點經得起我嘅嚴刑逼供，嘻嘻，結果臨尾一日俾我知道咗。就係咁，我好快咁嚮短短廿四小時內上網狂搵南丫島嘅資料，做好功課就出發嚕。

呢度就係IFC對出嘅中環４號碼頭喇。（原來去索罟灣同榕樹灣嘅入閘位係分開嫁，一唔小心就好易搞錯喇。）望下右邊，好似幾「市正」喎。

點知望埋左邊．．．咁核凸，點叫得做旅遊之都呀．．．

上船喇，好緊張呀。

離開中環嚕。隻船好吉，可能星期六先會多人Ｄ。

安琪兒其實好易暈船浪，於是伏嚮Darling度瞓咗一陣，大概半個鐘，Darling叫醒我，原來已經見到南丫島了。

係呢三支煙囪喇，仲有風車添，到目的地嚕。

一落船，第一時間就去碼頭隔離嘅天虹海鮮酒家食晏喇。

前舖後居，好鄉村嘅生活呀。

我哋坐嚮出面食，望過隔離就係呢Ｄ好得意嘅艇仔了。

一路望住個海一路點野食，真係一大樂事。

其實之前上網搵過關於天虹嘅食評，好壞參半。黎到見到周圍都無客，真係有Ｄ擔心。

唔理了，既然係一心要食海鮮，點可以唔黎返隻龍蝦呢。

牛油焗龍蝦，又香又彈牙，意想不到咁好味呀！

再黎清蒸飽魚，唔錯唔錯。

呢味係椒鹽魷魚，網上好多人推介，果然無介紹錯，真係超級好味。

Darling話淨係食餸唔夠，於是又叫咗呢個招牌菜天虹炒飯，以炒飯黎計，算係中上美味。