３７周嚟啦！

(29-11-09)

過埋今日就滿咗36周，聽日就係37周嘅開始，

仲有約三個星期就會見到响我肚裡面成日郁得好勁，

踢得好應嘅小Ｂ，我已經開始懷念佢响肚裡面踢嚟踢去嘅感覺，

雖然有好幾刻都想過要第三個，因為見到言言實在覺得小朋友好可愛，

不過人真係要量力而為，响人嘅角度下，我諗第三名嘅機會應該唔大囉！



今次小Ｂ踢同郁嘅程度我同老公都覺得勁過言言，

唔知佢出嚟後嘅表現係咪都會頑皮或者蹦蹦跳過言言呢？



上個星期三煲咗第一次嘅白蓮鬚，好多媽媽都受唔到個味，

但係好好彩我受到，可能第一次保唔係太濃，

我又落足冰糖，所以覺得似飲重味涼茶咁，

今晚煲第二煲，本來諗住一個星期一次，

叫朋友由香港帶咗三包嚟，但係好友 Iris 又不約而同地為我買咗三包，

所以呢家會一個星期飲兩次，據網友提供嘅資料所示，

如果為咗去胎毒而飲的話，最好六、七個月就開始飲，

我呢家先開始應該幫助不大，可惜我知道時已經太遲，

呢家唯有希望一個星期兩包密密飲，

加埋腐竹蛋糖水同埋芝蔴糊會幫到吓，

實在呢胎唔係太戒到口，但做女仔皮膚好緊要嘛，

自己以前都深受皮膚差的煩惱，希望兩個囡囡都唔好有同一問題啦！