軍裝巡小隊

                  由6月24日至今有個幾星期，如果我講你知我一日都未得閒過，你信唔信？ 

                   先講工作，有三年無做咇PC ，我心情的確好興奮，因為我係一個警痴，我係因為套軍裝先立志當差，可惜！因為我要吸取多方面嘅經驗，放底左套軍裝一段時間。  而家又可以重投軍裝嘅大家庭，我諗我要做夠先肯走。 睇我外型，人人都話我博到盡，又以為我會去抄位(轉POST)，實在係好唔了解我，我最愛嘅工作係軍裝巡邏，講都無人信。

                   第一日開工，我已經做到XX，對唔住！我講粗口！唉............之後果幾日，我比第一日更多嘢做，日日都收遲工，班同事即刻叫我做「黑仔」(我原本係叫LOK仔)。 唉................不過，我依然好享受著住軍裝去為國為民嘅生活。 雖然全部都唔係大案， 但我幫到每一位需要我嘅人。

                   去到呢隊我先知自己好老，我係隊入面最耐差嘅女警，亦耐差過3份2嘅師兄。 你可想而知我隊入面有幾多新人， 個個都經驗淺，不過勝在聽教聽話。  我阿SIR叫我要多D帶新人，因為隊入面好少人才(車！多餘！)，我都要人帶我，我都唔記得有幾耐無告過票，田心D路我又唔多熟，我覺得自己成個師太咁。

                   雖然我每日都做到死，但係我好有滿足感。 市民比我嘅感激同致謝，係我每日做到食都無得食嘅動力！  其實呢種感覺先係我當差咁多年依然充滿熱誠嘅原因，比任何嘅讚賞我，都唔及得你地滿意同感激嘅笑容，希望你哋會記得有一個警察曾經為你地提供過令你滿意嘅服務。 (如果你睇完之後覺得毛管棟，喺呢度我同你講聲對唔住！ 不過我心入面的確係咁諗)

                   再講爽爽同生活， 佢由停課開始，每日都喺屋企攪攪震，之後我老媽就同佢DISPUTE，我除開工要處理呢D家庭糾紛之外，我放工之後一樣做到無停手。 呢個衰豬，遲早激死我同我老媽子。

                   不過.........，我而家多左一個人替我分擔，係一個等左我四年嘅人，佢由我未離婚已經鐘意我，對我好好。 佢一直都係默默咁去為我付出，好多謝佢一直對我咁無微不致。 不過我一直都要佢等，一直等，之間同佢亦有好多拉鋸嘅時候。 同佢由同事變朋友，由朋友變知己，由知己變陌路，再由陌路變成今日-----我嘅男朋友。同佢所經歷過嘅，真係點滴在心頭！

                    可惜，我真係一個大忙人，就連拍拖嘅時間都好少，即使有時間，都係我、爽爽、同我媽咪四人行。 好多謝佢一直都以我嘅家人行先，我忙嘅時候，佢替我去照顧爽爽同我媽咪，呢D福利，係我以前無嘅。 而家只要我開一句聲，佢所有事都可以為我辦妥。

                    我同佢嘅二人世界就係傾電話， 佢送我返工同接我收工，之後.........好似真係無乜二人世界喇！  算啦，我都一把年幾，無就無啦！ 鬼叫我咁忙咩？ 鬼叫佢咁蠢揀我咩！好揀唔揀，揀一個有個女嘅麻煩女人，  不過我一有時間就會補償返比佢，起碼都要拖下手仔去行吓街，睇下戲吖。

                     可惜，我而家又要溫書喇，仲有兩個月就科舉，我要抓緊時間去溫習！聽日仲有好多挑戰等緊我！ 放馬過黎啦！